Оғир вазн келажаги сифатида эътироф этилган Мозес Итаумани чуқур нокаутга учратишди

Оқшомнинг марказий жангида 21 ёшли британиялик Мозес Итаума хорватиялик 34 ёшли Филип Хрговичга имкониятни бой берди. Итаума жангни жуда фаол бошлади ва иккинчи раунддаёқ рақибини нокдаун ҳолатига туширди. Тўртинчи раундда хорватиялик боксчи қаршилик кўрсата бошлади, бешинчи раунддан эса жанг суръати пасайиб, тенглашди ва ташаббус вақти-вақти билан Хрговичга ўта бошлади. Итаума тезлик бўйича устунликни сақлаб қолди, аниқроқ ва хавфлироқ ҳаракат қилди, рақибининг ияк қисмига бир неча бор зарба берди, бироқ уни жиддий тарзда ларзага сола олмади.

Саккизинчи раунднинг сўнгги дақиқасида Итаума узоқ давом этган ҳужумга бориб, кучини сарфлаб қўйди. Бунга бардош берган Хргович қарши ҳужумга ўтди. Тўққизинчи раунд ҳам хорватиялик боксчининг ҳужумлари билан бошланди. Итаума хавфли қарши зарбалар берди, аммо рақибини жиддий шикастлай олмади. Ушбу уч дақиқаликнинг охирига келиб, ҳолдан тойган британиялик қўлларини кўтара олмай қолди, гандираклаб, арқонларга суяниб қолди. Буни кўрган унинг секундантлари, ҳакам жангни тўхтатишга ҳозирлик кўраётган бир пайтда, рингга сочиқ ташлашди.

Расмий натижа — тўққизинчи раунднинг 2-дақиқаси 27-сониясида Филип Хргович нокаут эвазига ғалаба қозонди. Хргович оғир вазн тоифасида вакант бўлиб турган IBF камарини қўлга киритиб, Хорватия тарихидаги илк жаҳон чемпионига айланди.

"Мен ҳар бир раундда ютқазаётган эдим, рақибим мендан устунроқ бокс кўрсатаётган эди. Ғалаба қозониш учун кучни қаердан олганимни ўзим ҳам билмайман", — деди Хргович жангдан кейинги интервьюсида.