Оксана Чусовитина саккизинчи Олимпиадасига германиялик мураббий билан тайёрланади

Бу борада ўзбек ва жаҳон спорти афсонаси Оксана Чусовитинанинг ҳам Олимпиадага муносиб тайёрланиши муҳимдир. Бугун Ўзбекистон Миллий олимпия қўмитасида спортчимизни Токио Олимпиадасига индивидуал тайёргарлик кўриши масалалари муҳокама қилинди. Унда МОҚ раиси Рустам Шоабдураҳмонов, МОҚ Бош котиби Ойбек Касимов, МОҚ раиси ўринбосари Шерзод Ташматов, Ўзбекистон гимнастика федерацияси раиси вазифасини бажарувчи Руслан Мустаев, Токио-2020 лицензиати Оксана Чусовитина ва у билан ҳамкорликда ишлаши кутилаётган германиялик мутахассис Дитер Кох иштирок этишди. 

Тадбирда МОҚ раиси Токио Олимпиадасига тайёргарлик бўйича ўз фикрларини билдириб ўтди.

“Токио Олимпиадасига тайёргарликка шахсан Президентимиз бош-қош бўлиб турибдилар. Ҳукуматимиз бу борадаги барча масалаларимизни ижобий ҳал қилиб берган. Катта тажрибага эга хорижлик мураббийлар билан ишлаш биз учун қизиқарли. Оксанадан умидимиз катта. Спортчимиз ўзининг сўнгги Олимпиадасини медаль билан якунлашига тилакдошмиз”, – деди Рустам Шоабдураҳмонов.

Дитер Кох спорт гимнастикаси бўйича улкан тажрибага эга бўлган мураббий ҳисобланади. Унинг қўл остида Германия ва Буюк Британия жамоалари турли йилларда жаҳон чемпионати ва Олимпия ўйинларига тайёрланган. Келишувга кўра, Кох спортчимизнинг шахсий мураббийи бўлади ва Токио Олимпиадасига Чусовитинани ўзи тайёрлайди. Келишув Олимпия ўйинлари якунига қадар амал қилади.