Олимпиада. Шахматчиларимиз Беларусни мағлуб этиб, 3-ўринга кўтарилишди

Мазкур Олимпиадада Ўзбекистон терма жамоаси шарафини 5 нафар шахматчимиз - Осиё чемпиони Нодирбек Ёқуббоев, Шамсиддин Воҳидов, Осиё чемпионатининг бронза медали совриндори Саидакбар Сайдалиев, Ситора Сапарова ҳамда Далер Воҳидов ҳимоя қиляпти.

Ўзбекистон ўсмирлар терма жамоаси Жанубий Африка Республикаси ҳамда Аргентина терма жамоаларини мос равишда 4:0, 2,5:1,5 ҳисобида мағлуб этиб, эронлик шахматчилар билан дуранг (2:2) ўйнаганди.

Кеча ҳамюртларимиз Беларусь терма жамоаси шахматчиларидан 3:1 ҳисобида устун келиб, турнир жадвалида 3-ўринга кўтарилиб олишди. Нодирбек Ёқуббоев ва Далер Воҳидов рақибларидан устун келишди. Шамсиддин Воҳидов ва Саидакбар Сайдалиев эса дуранг қайд этишди.

Бугун шахматчиларимиз учинчи рақам остида сараланган Россия терма жамоасига қарши баҳс олиб боришади. Тўртинчи турдан сўнг Ўзбекистон терма жамоаси учинчи ўринни эгаллаб турибди. Иккинчи ўриндаги Эронда ҳам биз каби 11,5 очко бор. Тўртта учрашувда юз фоизлик натижа кўрсатган Россия терма жамоаси пешқадамлик қилмоқда.

Ўзбекистон - Беларусь 3:1

IM Ёқуббоев Нодирбек (2448) - FM Зарубицкий Вячеслав (2330) 1-0

WIM Баделка Ольга (2388) - IM Воҳидов Шамсиддин (2412) ½ - ½

Сайдалиев Саидакбар ((2362) - Иванникау Максим (2221) ½ - ½

Котау Арсений (2145) - Воҳидов Далер (2250) 0-1