Олимпия захираларини тайёрлаш тизимини янада кучайтириш мавзусида онлайн йиғилиш ўтказилди

ZOOM платформаси орқали ўтказилган ушбу йиғилишда Қўмита Бош котиби Ойбек Касимов, спорт турлари бўйича федерация ва ассоциацияларнинг мутасадди раҳбарлари иштирок этишди.

Тадбир аввалида Рустам Шоабдураҳмонов кучли захира спортчиларини тайёрлаш масаласининг қанчалик долзарб эканини таъкидлаб, бу борада қилиниши керак бўлган ишлар бўйича мутасаддиларнинг фикрини ўрганди. Йиғилиш давомида теннис, регби, гандбол ва бир қатор федерациялар раҳбарияти мазкур мавзу юзасидан ўз таклифларини билдириб ўтишди.

13 август куни Президент Шавкат Мирзиёев Токио-2020 Олимпия ўйинларида иштирок этган Ўзбекистон делегациясини қабул қилар экан, Париж-2024 Олимпиадасига тайёргарлик бўйича бир қатор вазифаларни белгилаб берди. Улар орасида жамоавий спорт турларида ҳам Олимпия ўйинларига йўлланма олиш вазифаси қўйилди.

Қайд этиш жоиз, спортга ихтисослашган таълим муассасаларида жамоавий йўналишларга ажратилган квоталар кам. Йиғилиш давомида шу ва бошқа масалалар, жумладан, Олимпия захиралари коллежи, Жисмоний тарбия ва спорт университетида жамоавий йўналишлардаги квоталар сонини кўпайтириш таклифи, спортчиларни қабул қилиш ва уларни ўқитиш тизими, миллий чемпионатларда рақобатбардош кучли клубларни кўпайтириш каби йўналишлар атрофлича муҳокама қилинди.

Шунингдек, Тошкент-2025 ёшлар Осиё ўйинларида иштирок этадиган жамоаларни шакллантириб бориш масаласи ҳам куннинг долзарб мавзуларидан бўлди. Тадбир якунида МОҚ раҳбари кун тартибидаги масалалар юзасидан федерацияларнинг таклифлари кўриб чиқилишини таъкидлаб ўтди.