Оммавий спорт сайлида бу сафар боксчилар жавлон уришди

Аҳоли орасида соғлом турмуш тарзини тарғиб қилиш, ёшлар орасида жисмоний тарбия ва спортни оммалаштириш мақсадида ташкил этилаётган мазкур сайллар шу кунгача велоспорт, таэквондо WTF, гандбол, каратэ каби спорт турларидан ўтказилганди.

Куни кеча мамлакатимизда энг оммавий спорт турларидан бири саналган бокс бўйича ҳам ана шундай спорт байрамига асос солинди. Бугунги кунда спортнинг ушбу турига ёшларни янада қизиқтириш, ривожлантириш ва оммавийликни ошириш йўлида талай ишлар амалга оширилмоқда. 

Бу борада Миллий олимпия қўмитаси ва Ўзбекистон бокс федерацияси томонидан вилоятларда бир қатор тадбирлар ташкил қилинди. Жумладан, Наманган, Хоразм, Фарғона, Сирдарё, Қашқадарё ва Тошкент вилоятларида ёш спортчилар учун мусобақалар, мастер-класслар ўтказилди. Ушбу тадбирлар минглаб ёшларимизни қамраб олди.

Албатта, мана шундай тадбирлар болакайларни спортга қизиқтириш йўлида катта аҳамиятга эга. Зеро, Олимпия ва Осиё ўйинлари ғолиблари, жаҳон ва қитъа чемпионлари ҳам ўз вақтида ана шу йўл орқали катта спортга кириб келишган.