Ўн тўрт ёшли Нодирбек Швейцарияда 19 гроссмейстерни ортда қолдирди!

Кеча Швейцариянинг Биле шаҳрида нуфузли Biel Master Tournament мусобақаси якунланди. Швейцарча тизимда ўтказилган ва 9 турдан иборат бўлган халқаро турнирда 31 давлатдан 117 нафар шахматчи иштирок этди. 

Улар орасида 14 ёшли ўзбекистонлик халқаро гроссмейстер Нодирбек Абдусатторов ҳам бор эди. Ҳамюртимиз 23-рақам остида таснифланган бўлсада, мусобақани мағлубиятсиз якунлади ва совринли 9-ўринни эгаллади. 

Ҳиндистонлик гроссмейстер Ваибхав Сури 9 имкониятдан 7 очко жамғариб, турнир ғолибига айланди. Эътиборлиси, 2-9 ўринни эгаллаган шахматчилар бир хил 6,5тадан очко жамғаришди. Бу шахматчилар орасида Нодирбек ҳам бўлиб, у энг ёш иштирокчи эди. 

Нодирбек Абдусатторов турнир жадвалида 19 нафар машҳур  гроссмейстерларни ҳам ортда қолдиришга муваффақ бўлди.