Онлайн мусобақалар ғолиблари тақдирланди + ФОТО

Аввал хабар бериб ўтганимиздек, Тошкент вилояти Жисмоний тарбия ва спорт бошқармаси томонидан карантин вақтида аҳолининг бўш вақтини мазмунли ўтказиш мақсадида бир қатор спорт турларидан онлайн мусобақалар ташкил этилган эди.

Тошкент вилояти аҳолиси ўртасида Таэквондо ВТФ, Каратэ ВКФ, Ўзбек жанг санъати ва Таэквондо ИТФ спорт турлари бўйича ўтказилган онлайн мусобақаларда 10 мингга яқин иштирокчилар ўз маҳоратларини намойиш этган видеороликлар ёрдамида ғолиблик учун кураш олиб боришди.

Мусобақа учун масъул бўлган ҳакамлар гуруҳи томонидан барча видеороликлар кўриб чиқилиб энг муносиблар ғолиб деб топилди. Бундан ташқари иштирокчилар орасидан алоҳида видеороликлар танлаб олиниб Тошкент вилояти Жисмоний тарбия ва спорт бошқармаси бошлиғи томонидан алоҳида мукофотлар билан тақдирланди.

Бугун онлайн мусобақаларда ғолиб ва совриндор деб топилган иштирокчиларга олдиндан ваъда қилинган қимматбаҳо совғалар топширилди. Шунингдек ғолибларга спорт эпировкалари ҳам тақдим қилинди.

Ҳукуматимиз томонидан карантин даврининг узайтирилиш натижасида Тошкент вилояти Жисмоний тарбия ва спорт бошқармаси томонидан яна бир қатор спорт турлари бўйича онлайн мусобақалар давом эттирилиши режалаштирилмоқда.

Азиз Тошкент вилояти аҳолиси, карантин даврида уйингизда қолиб, спорт билан шуғулланинг ҳамда онлайн мусобақаларда иштирок этиб, ғолибликни қўлга киритинг! Биз сиз билан коронавирусни албатта енгамиз!