Осиё чемпионати. Велоспортчиларимизнинг кечаги бенефисидан ФОТОГАЛЕРЕЯ

Кеча икки нафар вакилимиз спринт пойгасида шохсупага кўтарилди. Аёллар ўртасида 23 ёшгача бўлган спортчилар тоифасида ҳамюртимиз Рената Байметова бронза медалини қўлга киритди. У 30 километрга ўтказилган пойгада Хитой Тайпейи вакили Тин Тин Чан ҳамда кунчиқар юрт Япония терма жамоаси аъзоси Юми Кажихарадан ортда қолган ҳолда марра чизиғини кесиб ўтди.

Ўзбекистон терма жамоасига дастлабки олтин медални эса кўплаб халқаро турнирлар ғолиби Ольга Забелинская тақдим этди. 30 километр масофага кечган элит, яъни катталар тоифасидаги пойгада у энг яхши натижани қайд этди ва олтин медалга сазовор бўлди. 

Шуни алоҳида таъкидлаш жоиз, бу терма жамоамизнинг мазкур мусобақадаги биринчи олтин медали бўлди. Ушбу масофада кумуш медал Жанубий кореялик Жуми Ли, бронза медали эса Хитой Тайпейи вакиласи Тин Йин Хуангга насиб этди.

Суратлар муаллифи - Алимурод Мамадаминов