Осиё чемпионатида 34та медал қўлга киритилди, шулардан 16таси олтин + ФОТО

Қитъа чемпионатида муваффақиятли иштирок этган Ўзбекистон терма жамоаси аъзолари якунда блиц, рапид ва стандарт йўналишларда жами 34та медални қўлга киритишди. Шулардан 16таси олтин, 11таси кумуш, 7таси бронза медалларидир. 

Табиийки, умумжамоа ҳисобида шахматчиларимиз барча иштирокчи давлатлар орасида биринчи ўринни эгаллашди. Ёш шахматчиларимиздан 7 нафари 2019 йили Тунис давлатида ўтказиладиган мактаб ўқувчилари ўртасидаги жаҳон чемпионатида қатнашиш ҳуқуқини қўлга киритишди. 

Ҳамюртларимиздан 13 ёшлилар мусобақасида иштирок этган Умида Омонова (WCM) мусобақанинг мутлоқ ғолибасига айланди. У стандарт, рапид ва блиц йўналишларида 3та олтин медални қўлга киритди. 

Ҳумоюн Бекмуродов (9 ёш, СМ) стандарт ва рапидда олтин, блиц йўналишда кумуш медалга сазовор бўлди.  Афруза Ҳамдамова (9 ёш, WCM) стандарт ва рапидда олтин, блицда кумуш медал билан тақдирланди. Давлатбек Маҳмуджонов (11 ёш) стандарт ва блиц йўналишда олтин, рапид йўналишида бронза медалига эга чиқди. 

Абдумалик Абдусалимов (17 ёш, FM) стандарт йўналишда олтин, рапид ва блицда кумуш медаллар билан тақдирланди. Ситора Сапарова (17 ёш) стандарт, блиц ва рапид йўналишларида мос равишда олтин, кумуш ҳамда бронза медалини қўлга киритди. 

Али Қосимов (15 ёш) стандарт йўналишда Осиё чемпиони, рапидда эса кумуш медалга сазовор бўлди. Муҳаммадали Абдураҳмонов (17 ёш) блицда олтин, рапид ва стандартда бронза медалига лойиқ кўрилди.

Руқия Олимова (7 ёш) блицда олтин, стандартда кумуш, Зилола Актамова (11 ёш) блицда олтин, рапидда кумуш, Олмос Раҳматуллаев (13 ёш) рапидда олтин, стантдартда кумуш, Тоҳир Неъматов (7 ёш) блицда кумуш, рапид йўналишида бронза медалига эга чиқди. 

Моҳинур Ҳабибуллаева (13 ёш) блицда кумуш, Муҳаммадзоҳид Суяров (9 ёш) эса айнан шу йўналишда бронза медалини қўлга киритди.