Осиё Кубогининг тантанали очилиш маросими ёрқин лаҳзаларга бой бўлди ФОТОГАЛЕРЕЯ

Ўсмирлар ва ёшлар ўртасида ташкил этилаётган ушбу мусобақанинг бугун тантанали очилиш маросими ўтказилди. Мухлислар билан тўлган "Универсал" спорт саройидаги ушбу тадбирда Спортни ривожлантириш вазири Адҳам Икрамов, МОҚ Бош котиби Ойбек Касимов, Қўмита раиси ўринбосари, мамлакат дзюдо федерацияси раиси Азизжон Камилов, МОҚ раиси ўринбосари Шерзод Ташматов, Халқаро дзюдо федерацияси (IJF) Бош рефери директори Армен Багдасаров ҳамда ўзбек дзюдосининг қатор номдор вакиллари ҳозир бўлишди. Тадбирни Азизжон Камилов табрик сўзи билан очиб берди.

"1995 йилдан бери ўтказиб келинаётган ушбу мусобақанинг ёш дзюдочилар фаолияти ва ҳаётида тутган ўрни беқиёс. Катталар терма жамоасига йўл айнан шу каби мусобақалардан бошланади. Турли йилларда Елдос Сметов, Асхат Житкеев, Максим Раков (барчаси Қозоғистон), Юрий Краковецкий (Қирғизистон), Ришод Собиров, Абдулла Тангриев, Рамзиддин Саидов, Давлат Бобонов сингари Олимпиада ҳамда жаҳон чемпионати ғолиб ва совриндорлари айнан Учқун Муродов турнирида иштирок этишган. Бу йилги мусобақада қатнашаётган ёш дзюдочилар орасидан ҳам йиллар ўтиб Олимпиада шоҳсупасига кўтариладиган спортчилар етишиб чиқишига ишонаман", - деди А.Камилов.     

Очилиш маросимининг бадиий қисмида "Наврўз" ашула ва рақс ансамблининг чиқишлари, Камол Муродов ва Ўлмас Гуллиев шогирдларининг татамидаги ҳаракатлари аренага йиғилганларга кўтаринки руҳ бағишлади.