Осиё Миллатлар кубоги-2018да 4-тур ортда қолди

Кеча стандарт шахмат баҳсларида 4-тур учрашувлари ўтказилди. Хабарингиз бор, Осиёнинг кучли шахмат жамоалари қатнашаётган ушбу нуфузли мусобақада Ўзбекистон эркаклар ва аёллар терма жамоалари ҳам иштирок этяпти. 

Ёш шахматчилардан иборат эркаклар терма жамоамиз гроссмейстерлардан таркиб топган Вьетнамга қарши дона сурди. Биринчи доскада 16 ёшли халқаро мастер Якуббоев Нодирбек оқ доналарда (2512) GM Nguyen Ngoc Truong Son (2618) билан, учинчи доскада Жавоҳир Синдаров (2474) эса GM Nguyen Duc Hoa (2441) билан дурангга имзо чекди. IM Хорошев Никита ва FM Абдисалимов Абдималик эса қора доналарда вьетнамлик гроссмейстерларга имкониятни бой беришди.

Шунга қарамай, кейинги турда Бангладеш терма жамоасини мағлуб этишди. Тўртинчи тур натижаси 1½:2½ ҳисобида Ўзбекистон фойдасига ҳал бўлди. Бешинчи тур олдидан Ўзбекистон эркаклар терма жамоаси Ҳиндистон билан 4-5 ўринларни бўлишиб турибди. 

Бугун, 1 август куни 5-турда Ўзбекистон эркаклар терма жамоаси Эроннинг Iran Red (ўртача рейтинги - 2508) шахматчиларига қарши баҳс олиб боради. 

Мусобақада иштирок этаётган Ўзбекистон аёллар терма жамоаси ҳам совринли ўринлар учун кураш олиб боряпти. Қизларимиз аввалига 3-турда Сурия терма жамоасини 4:0 ҳисобида мағлуб этишди. Лекин 4-турда улар анча кучли ҳисобланган вьетнамлик дугоналарига ютқазиб қўйишди.

Худди эркаклар терма жамоамизда бўлгани каби биринчи ва учинчи доскада ўйнаган шахматчиларимиз WGM Гулруҳбегим Тоҳиржонова ҳамда WIM Ирина Геворгян рақибалари билан дуранг қайд этишди. Қора доналарда ҳаракат қилган қолган икки қизимиз эса ўз партияларини бой беришди. 

Бугун ўтказиладиган 5-тур олдидан Ўзбекистон аёллар терма жамоаси турнир жадвалида 4-ўринни эгаллаб турибди. Қизларимизни олдинда Қозоғистон, Эрон ва Хитой терма жамоаларига қарши ўтказиладиган бир-биридан мураккаб учрашувлари кутиб турибди. 

Халқаро ҳакамлар жамоаси