Осиё Миллатлар Кубоги. 5-турда ҳар икки жамоамиз мағлуб бўлди

Кеча стандарт шахмат бўйича ўтказилаётган турнирда 5-тур учрашувлари ўтказилди. Бу турда Ўзбекистон эркаклар ва аёллар терма жамоамиз рақибларига бир хил ½ :3½ ҳисобида имкониятни бой берди.

Эркаклар жамоамиз Эроннинг Iran Red (ўртача рейтинги 2508) шахматчиларига ютқазиб қўйди. Биринчи доскада ҳаракат қилган 16 ёшли халқаро мастер Нодирбек Ёқуббоев эронлик машҳур гроссмейстер 35 ёшли Эҳсон Магами билан дуранг ўйнади. Эронлик бу шахматчи 8та халқаро олимпиадада иштирок этган. Қолган шахматчиларимиз мағлубият аламини тотиб кўришди. 

Бугун 2 август куни 6-турда Ўзбекистон эркаклар терма жамоаси 2-доскада турнир жадвалида иккинчи ўринни эгаллаб турган Хитой (ўртача рейтинги 2609) терма жамоаси шахматчиларига қарши дона суради.

Ўзбекистон аёллар терма жамоаси (ўртача рейтинги 2256) эса қозоғистонлик дугоналарига (ўртача рейтинги 2404) имкониятни бой беришди. Биринчи доскада ўйнаган WGM Гулруҳбегим Тоҳиржонова халқаро мастер, 20 ёшгача шахматчилар ўртасида жаҳон чемпиони Динара Садуакассова билан дуранг қайд этди. Бугун 6-турда қизларимиз турнир жадвалида 3-ўринни эгаллаб турган Эроннинг Iran Green (2270) жамоасига қарши баҳс олиб боришади