Ўсмирларимиз Олимпия ўйинларига яна битта лицензия қўлга киритишди

Айни пайтда Испаниянинг Барселона шаҳрида ўсмирлар ўртасида байдарка ва каноэда эшкак эшиш бўйича жаҳон чемпионати давом этмоқда. Қувонарлиси, ушбу нуфузли мусобақанинг спринт ва слалом баҳсларида юртимиз шарафини ҳимоя қилаётган фарғоналик Ислом Абдусаломов ҳозиргина III ўсмирлар Олимпия ўйинлари лицензиясига эга бўлди. У иккикураш якунларига кўра жаҳонда иккинчи ўринни эгаллади ва Аргентинадаги нуфузли мусобақа йўлланмасига эга бўлди.  

Шунингдек, мазкур йўналишда қизлар ўртасидаги беллашувларда иштирок этаётган Гулбаҳор Файзиева (Тошкент вилояти) спринт баҳсларидан сўнг биринчи ўринда кетмоқда ва лицензия қўлга киритишга жуда яқин турибди. Умид қиламизки, бугун ўтказиладиган слалом баҳсларидан сўнг Гулбаҳор ҳам терма жамоамиз ҳисобига яна бир йўлланмани қўшиб қўяди.

Маълумот учун, бугунги кунга қадар ҳамюртларимиз қуйидаги спорт турларида III ёзги ўсмирлар Олимпия ўйинлари лицензиясига эга бўлиб улгуришди:

Оғир атлетика - 3 та

Академик эшкак эшиш - 2 та

От спорти (конкур) - 1 та

Таэквондо - 1 та

Байдарка ва каноэда эшкак эшиш  - 1 та

Эслатиб ўтамиз, III ўсмирлар Олимпия ўйинлари жорий йилнинг 6-18 октябрь кунлари Аргентина пойтахти Буэнос–Айресда бўлиб ўтади.