Остон Ўрунов "Навбаҳор" билан шартномасини узайтирди

2018 йилги мавсумда ўзининг ажойиб ўйинлари билан наманганлик мухлислар меҳрини қозона олган ёш, истеъдодли футболчи Остон Ўрунов 2019 йилги мавсумни ҳам «Навбаҳор»да ўтказадиган бўлди. Бу ҳақда «Навбаҳор» мухлислар клубининг телеграмдаги канали хабар берди.
 
Ярим ҳимоячи келгусида фақатгина хориждан таклиф бўлсагина «Навбаҳор»дан кетиши мумкинлигини айтди. Эслатиб ўтамиз, футболчи 28 декабрь куни инстаграмдаги ўз саҳифасига қуйидаги фикрни ёзган эди: 

- Шу жамоага биринчи келганимда мени ҳеч ким танимасди. Ҳозирги кунга етиб келишимда мана шу акаларимнинг жуда катта ўрни бор. Уларнинг ҳаммаларига раҳмат, бир ярим йил сизлар билан бирга ўйнаганимдан хурсандман. Бундай аҳил жамоани бошқа кўрмасам керак, яна бирга бўлиш насиб қилсин! Албатта, қўллаб-қувватлаганликлари учун мухлисларга ҳам раҳмат. натижаларда уларнинг ҳам ўрни катта. 

Кейинроқ унинг Россия клубига ўтиши мумкинлиги ҳақида хабарлар чиққан эди. Ҳозирча «Навбаҳор» матбуот хизмати Ўрунов билан шартнома узайтирилгани борасида расмий хабар бергани йўқ.