“Отам, онам ва мен - соғлом спортчимиз”: Тошкент вилояти босқичи ғолиблари аниқланди

Тошкент вилоятида спортни янада оммалаштириш, аҳоли ўртасида соғлом турмуш тарзини кенг тарғиб қилиш ва Ўзбекистон Республикаси Президентининг 2020 йил 30 октябрдаги “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги Фармони ижросини таъминлаш мақсадида спорт-таълим муассасалари ва турли корхона-ташкилотларнинг ишчи-ходимлари ҳамда маҳалла аҳолиси иштирокида эрталабки бадантарбия машғулотлари, юриш, югуриш каби спорт тадбирлари ташкил этилмоқда.

Аҳоли қатламларини бу каби спорт тадбирларига фаол жалб этишда ҳафтанинг дам олиш кунларидан унумли фойдаланилмоқда. Шу куни ҳафта давомида доимий иш билан банд бўлган Тошкент вилояти аҳолиси вакиллари ўз оилалари билан спорт тадбирлари ва мусобақаларида иштирок этмоқда.

Жумладан, ортда қолган ҳафтада вилоят бўйлаб, уч босқичда “Отам, онам ва мен - соғлом спортчимиз” шиори остида "Қувноқ стартлар" мусобақаси ташкил этилди. Дастлаб, ҳар бир маҳаллада ғолиблар номига аниқлик киритиб олинган бўлса, кейинчалик улар туман босқичида жам бўлишди.

Ўтган ҳафтанинг дам олиш кунлари ушбу мусобақанинг вилоят босқичи Чирчиқ давлат педагогика институти спорт объектларида ташкил этилди. Туманларда ғолиб бўлган спортчи оилалар вилоят кубоги учун кураш олиб боришди.

Мусобақа натижаларига кўра, 1-ўринни Паркент туманидан Тангрибоевлар оиласи қўлга киритган бўлишса, Чирчиқ шаҳридан Искандаровлар оиласи 2-ўринга лойиқ кўрилди. 3-ўрин эса Зангиота туманидан Қовунбоевлар оиласига насиб этди.

Мусобақа якунида ғолиб ва совриндорларга ҳамкор ташкилотлар томонидан эсдалик совғалари тақдим этилди.