Ўзбекистон бўйлаб пиёда: Сирдарёлик икки йигит Андижондан Мўйноққача пиёда боришга аҳд қилишди

Ўзбекистон Республикаси Президентининг 2020 йил 30 октябрдаги “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги Фармони ижросини таъминлаш мақсадида сирдарёлик икки юртдошимиз бутун Ўзбекистон бўйлаб пиёда юриб ўтишга қарор қилишди. 

Сирдарё вилояти Сайхунобод туманида истиқомат қилувчи Элдорбек Жўраев ҳамда Тўлқин Усмоновлар Андижондан Мўйноқача бўлган масофани, яъни бутун мамлакатимизни пиёда босиб ўтишга отланишди.

Ўз юришини шу йил 15 февраль куни Андижон вилоятидан бошлаган бу икки йигит бугун Фарғона вилояти марказига етиб келишди. Қайд этиш керак, ушбу юртдошларимиз бошлаган ташаббус Сирдарё, Андижон, Фарғона, Наманган вилоятлари Жисмоний тарбия ва спорт бошқармалари томонидан қўллаб-қувватланди.

Хусусан, Сирдарё вилояти Жисмоний тарбия ва спорт бошқармаси Э.Жўраев ва Т.Усмоновни спорт формалари билан таъминлаган бўлса, Андижон, Фарғона, Наманган вилоятлари эса ташаббускор ёшларни кутиб олиш, ётоқ жой билан таъминлаш, кузатиш каби масалаларда ёрдамларини аяшмаяпти. Қисқаси, Президент Фармони ижросини таъминлаш мақсадида барча бирлашмоқда.