Ўзбекистон давлат жисмоний тарбия ва спорт университети кунчиқар мамлакат нигоҳида

Меҳмонлар орасида “So-innovation laboratory” ташкилоти ижрочи директори жаноб Дайсуко Хашимото, Япония Таккю-воллей федерацияси вице-президенти ва тарғибот қўмитаси раиси жаноб Южи Хорикава ҳамда ЖАЙКАнинг Ўзбекистондаги ваколатхонаси лойиҳалар координатори Фарҳод Қурбонов ҳам бор эди. Меҳмонларни университет ректори, профессор Маҳмуджон Болтабоев кутиб олди. Даставвал меҳмонлар университетда талабалар учун яратилган шарт-шароитлар билан таништирилди.

Шундан сўнг 2019 йил 21 ноябрдан 2 декабргача “Имконияти чекланган инсонларни спорт билан шуғулланиш орқали ижтимоий мослашувини қўллаб-қувватлаш” мавзусида семинар-тренинг ўтказиш ва ташкилот раҳбарлари билан ҳамкорлик алоқаларини ўрнатиш юзасидан учрашув ўтказилди. Учрашувда “Имконияти чекланган инсонларни спорт орқали ижтимоий қўллаб-қувватлашни ташвиқот қилиш” бўйича ўзаро ҳамкорлик алоқаларини йўлга қўйиш ҳамда семинар-тренинг машғулотларини ўтказишдаги ташкилий масалалар муҳокама қилинди.

Куннинг иккинчи ярмида талабаларга япониялик мутахассислар томонидан Таккю-воллей спорт тури бўйича мастер-класс ташкил этилди.

Эслатиб ўтамиз, ушбу семинар-тренинг машғулотлари 3 кун давомида, 25 ноябрь куни Ўзбекистон давлат жисмоний тарбия ва спорт университетида, кейинги семинар-тренинг машғулотлари эса 26-27 ноябрь кунлари Жисмоний тарбия ва спорт бўйича мутахассисларни илмий-методик таъминлаш, қайта тайёрлаш ва малакасини ошириш марказида ўтказилиши режалаштирилган.