Ўзбекистон Жисмоний тарбия ва спорт вазирлигида йиғилиш бўлиб ўтди. Уни Азиз Абдуҳакимов олиб борди

Мажлисда бир қатор муҳим масалалар муҳокама қилинди. Улар орасида ўзбекистонлик спортчиларнинг Токио Олимпиадасига олиб бораётган тайёргарлиги, олдинда турган лицензион турнирлар, тўрт йилликнинг энг нуфузли мусобақасига йўлланмани қўлга киритиб улгурган атлетларимизнинг бўлажак беллашувларга муносиб ҳозирлик кўриши учун шарт-шароитларни яратиб бериш каби масалаларни алоҳида таъкидлаш ўринли. 

Бу борада ҳар бир вилоят ҳоким ўринбосарларига аниқ вазифалар юкланди. Ҳоким ўринбосарлари ўз вилояти спортчиларининг Олимпиадага муносиб тайёргарлик кўриши, ортиқча муаммолардан ҳоли бўлиши ва шунга ўхшаш масалаларни шахсан назорат қилиб бориши уқтирилди.

Бундан ташқари, ҳозирнинг ўзида Париж-2024 Олимпиадасига тайёргарликни бошлаш, селекция ишларини жадаллаштириш, ҳар бир спорт тури бўйича таркибда соғлом рақобатни юзага келтириш, муносиб номзодларни тайёрлаб бориш, вилоят спорт бошқармалари ҳамда федерацияларнинг янги тизимини яратиш, иш унумдорлигини ошириш, иқтидорли спортчиларни саралаб олиш ва рағбатлантириш  масалалари ҳам муҳокама қилинди.   

Йиғилишда шунингдек, мамлакатимизда шахмат спорт турини янада оммалаштириш масаласига ҳам тўхталинди. Куни кеча “Шахматни янада ривожлантириш ва оммавийлаштириш ҳамда шахматчиларни тайёрлаш тизимини такомиллаштириш чора-тадбирлари тўғрисида” Президент қарори қабул қилинганди. Жойларда ушбу қарорнинг ижросини таъминлашга жиддий эътибор қаратиш лозимлиги айтилди.