Ўзбекистон сафига ўтган Европа чемпиони Илья Сибирцев: "АҚШдаги жамоам мамлакатдаги энг кучли 10 та жамоадан бири"

Ўзбекистон сузиш терма жамоаси мусобақадан олдин асли россиялик Илья Сибирцевни ўз таркибига қўшиб олди. АҚШдаги Луисвил университети талабаси ҳисобланади. У айнан шу университетда шуғулланади ва мусобақаларда иштирок этади.

2023 йилги АҚШ чемпионатида иккита бронза медалини қўлга киритган Илья Ўзбекистон сафидаги илк Жаҳон чемпионати олдидан фикрлари билан ўртоқлашди:

- Жаҳон чемпионатига қандай режа асосида тайёргарлик кўряпсиз?

Айни пайтда мен АҚШда тахсил оламан ва мусобақаларга Университет жамоаси бош мураббийи Артур Альбиеро бошчилигида тайёргарлик кўраман. Бизнинг жамоа Американинг 10 та кучли жамоаларидан бири ҳисобланади. Табиийки, тайёргарлик машғулотлари юқори савияда олиб борилади. Бизнинг жамоамизда Доҳа шаҳрида ўтказиладиган жаҳон чемпионатига ҳозирлик кўраётган бошқа юрт спортчилари ҳам бор. 

- Машғулотлар қаерда ва қандай шароитда олиб борилади?

Бизнинг Университетда 50 метрлик бассейн мавжуд. Биз шу ерда шуғулланамиз. Аксарият мусобақалар 25 метрлик бассейнларда ўтказилгани боис, машғулотлар асосан бассейннинг ярим қисмида ўтказилади. Бизнинг жамоа 50 нафар сузувчи ва яна 10 нафар сувга сакраш усталаридан иборат. Спортчилар ўзлари иштирок этадиган йўналишларга кўра, гуруҳларга ажратилган. Бундан ташқари жамоамизда шифокорлар, диетологлар, психологлар фаолият кўрсатишади. 

- Машғулотлар кимнинг бошчилигида олиб борилади?

Жамоамиз 20 йилдан зиёд вақт давомида бош мураббий Артур Альбиеро бошчилигида машғулотлар ўтказиб келади. Ушбу мутахассис АҚШнинг машхур ва катта тажрибага эга мураббийлардан ҳисобланади. Унинг қўл остида дунёнинг кўплаб номдор спортчилари шуғулланиб келишган. Артур Альбиерога машғулотларда бир қатор ёрдамчи мураббийлар кўмаклашадилар. Улар спортчиларнинг йўналишларига қараб машғулотларни ўтказишади. Шахсан мен тажрибали мутахассис Рид Фужан қўл остида шуғулланаман. Доҳада ўтадиган жаҳон чемпионатига юқорида номлари зикр этилган икки мутахассис бошчилигида тайёргарлик кўряпман.

 - Сиз Америкада ташкил этиладиган қатор мусобақаларда иштирок этасиз. Мазкур мусобақалардаги рақобат мухити ҳақида ҳам сўзлаб беринг. 

 Мавсум давомида Университет жамоалари ўртасида кўплаб мусобақалар ташкил этилади. Бу мусобақалар кун давомида ўтказилади ва уч соат ичида икки ёки уч хил масофага сузишга тўғри келади. Бундан ташқари аксарият спортчилар эстафета баҳсларида ҳам стартга чиқишади. Мусобақалар бир неча ҳафта давомида жума ёки шанба кунлари ўтказилади. Ўйлашимча, бундай стартлардан кейин рақобат мухити ҳам ўсиб бораверади. АҚШнинг барча Университетларида бассейнлар мавжуд ва ҳар бир мусобақа ўта кучли рақобат остида кечади.