Ўзбекистон шахмат федерацияси раисига янги ўринбосар сайланди

Конференцияда Ўзбекистон шахмат федерацияси раҳбарияти ва мутасаддилари, ҳакамлар ҳамда ОАВ ходимлари иштирок этди. Унда ўтган 2018 йилда шахматчиларимизнинг турли нуфузли мусобақаларда қўлга киритган ютуқлари, федерация низомига киритилган ўзгариш ва қўшимчалар ҳақида маълумот берилди.

Федерация раисининг биринчи ўринбосари Х.Турдиалиев сўнгги йилларда юртимизда шахмат аҳоли орасида кенг оммалашаётгани, натижада навқирон авлод ичидан истеъдодли спортчилар етишиб чиққан ҳолда юксак натижаларга эришаётганини таъкидлади.

Дарҳақиқат, ўзбекистонлик шахматчилар сўнгги йилларда нуфузли мусобақаларда муваффақиятли иштирок этиб келишмоқда. Спортчиларимиз 2018 йилги спорт мавсумида 70га яқин мусобақада қатнашиб, 87та олтин, 81та кумуш, 61та бронза, жами 229та медални қўлга киритишди. Юксак натижаларга эришган шахматчилар ва уларнинг мураббийлари давлатимиз ҳамда шахмат федерацияси томонидан муносиб тақдирланди.

Конференцияда Ўзбекистон Республикаси Президенти Шавкат Мирзиёевнинг 2018 йил 9 августдаги “Ўзбекистон Республикасида шахматни ривожлантириш бўйича қўшимча чора-тадбирлар тўғрисида”ги қарори ижросини таъминлаш бўйича амалга ошириладиган ишлар, жорий йилги мусобақаларда спортчиларимизнинг муносиб иштирок этишларини таъминлаш, иқтидорли шахматчиларни терма жамоа сафига қўшиш борасида муҳим вазифалар белгилаб олинди.

Кун тартибидан ўрин олган асосий масала – федерация раисига ўринбосар сайлашдан иборат эди. Шу муносабат билан мазкур лавозимга Шерзод Каримов номзоди илгари сурилди. Конференция иштирокчилари бир овоздан кўрсатилган номзодни қўллаб-қувватлашди. Шу тариқа, Ш.Каримов Ўзбекистон шахмат федерацияси раисининг ўринбосари лавозимига сайланди.