Ўзбекистон Тбилиси "Катта Дубулға" турнирида нечанчи ўринни эгаллади?

Уч кун давомида дунёнинг 5 қитъаси 83 давлатидан келган 531 нафар дзюдочи мусобақа медаллари ҳамда Париж-2024 Олимпиадаси йўлидаги қимматли рейтинг очколари учун татамига чиқди. 

Ўзбекистон терма жамоасининг жами 18 нафар дзюдочиси ҳам Тбилиси татамиларида ўз маҳоратини намойиш этди. Илиас Илиадис шогирдлари якунда иккита кумуш медаль билан умумжамоа ҳисобида 83 давлат орасида 12-ўринни эгаллади. Сардор Нуриллаев (-66 кг) ва Шарофиддин Болтабоев (-81 кг) терма жамоамизга кумуш медалларни тақдим этишди. 

Грузия терма жамоаси медаллар жамғариш бўйича катта фарқ билан пешқадамга айланди. Мезбонлар 4 та олтин ва 1 та бронза медалини қўлга киритишди. Кучли учликдан Испания ва Канада терма жамоалари жой олишди. Жами 8 давлат дзюдочилари камида 1 та олтин, 24 таси камида 1 та бронза медалини расмийлаштирди.