Ўзбекистон учун иккинчи Олимпиадасида қатнашадиган Жавраил Шапиевга кимлар рақиб бўлади? (Барча тафсилотлар)

Мусобақада Ўзбекистон делегацияси, жумладан спорт курашлари бўйича терма жамоамиз ҳам иштирок этади. Олимпиадада 3 нафар эркин курашчимиз, 3 нафар юнон-рим курашчимиз ва ягона аёл курашчимиз гиламга чиқади.

Olamsport.com Бирлашган кураш дунёси (UWW) тасдиқлаган рўйхатга кўра спортчиларимизга турнир доирасида кимлар рақиб бўлиши ҳақида маълумот бериб боради.

Ўтган сонларда эркин курашчиларимиз Ғуломжон Абдуллаев ва Разамбек Жамаловнинг бўлажак рақиблари ҳақида сўз юритган эдик.

Бу сафар эса эркин курашдаги сўнгги, учични спортчимиз Жавраир Шапиевнинг вазнига назар ташлаймиз.

27 ёшли Жавраил Шапиев фаолиятидаги иккинчи Олимпиадада чиқиш қилади. Асли чеченистонлик курашчи Токио Олимпиадасида ҳам Ўзбекистон сафида қатнашган. Унинг Париждаги чиқиши 8-9 август кунларига тўғри келади.

Жавраил Шапиевга Олимпиадада қуйидаги курашчилар рақиблик қилиши мумкин:

Фатиҳ Бенфержалла (Жазоир)

Жайден Лоуренс (Австралия)

Осман Нурмагомедов (Озарбайжон)

Магомед Рамазанов (Болгария)

Александр Моур (Канада)

Владимир Гамкрелидзе (Грузия)

Даурен Куруглиев (Греция)

Хасан Яздани (Эрон)

Хаято Ишигуро (Япония)

Азамат Даулетбеков (Қозоғистон)

Бат Эрдене Бямбасурен (Мўғулистон)

Этан Рамос (Пуэрто-Рико)

Амин Майлс (Сан-Марино)

Васил Михайлов (Украина)

Аарон Брукс (АҚШ).

Ушбу вазн тоифасида амалдаги Олимпиада чемпиони америкалик Дэвид Тейлор ҳисобланади. Гарчи у Париждаги ўйинларда иштирок этмаса-да, эронлик Ҳасан Яздани Токио Олимпиадасида кумуш, Сан-Марино вакили Амин Майлс эса бронза медалини қўлга киритгани ва улар Парижда ҳам ўз юрти шарафини ҳимоя қилишини таъкидлаш зарур.

Осиё ўйинлари ва Осиё чемпионати совриндори Жавраил Шапиев Токио Олимпиадасида бронза медали учун баҳсда россиялик Артур Найфоновга мағлуб бўлган ва бешинчи натижани қайд этган эди. Найфонов ҳам Париж Олимпиадасида қатнашмайди. Умид қиламизки, Шапиев бу сафар Токиодаги натижасини янада яхшилайди.