Ўзбекистон велосипед спорти федерациясида 2021 йил режалари муҳокама қилинди

Шу боис мавсум олдида турган режалар, Олимпия йилида қилинадиган ишлар, юртимизда велосипед спорти турларини янада ривожлантириш ва ушбу спорт билан шуғулланувчилар сонини кўпайтириш, спортчиларимизни йирик мусобақаларга тайёрлаш каби масалаларга бағишланган йиғилиш бўлиб ўтди.

Ўзбекистон велосипед спорти федерацияда бўлиб ўтган йиғилишни федерация бош котиби Козим Ўринбойхўжаев олиб борди. Унда терма жамоамиз мураббийлар штаби, федерация ходимлари иштирок этган бўлишса, вилоятлар бўлимлари онлайн платформа орқали йиғилишни кузатиб боришди.

Козим Ўринбойхўжаев даставвал ортда қолган 2020 йилда амалга оширилган ишлар бўйича қисқача тўхталиб, карантин чекловлари кучайтирилган даврда ҳам фаолият олиб борган мутасаддиларга ташаккур айтиб ўтди. Шундан сўнг кун тартибидаги асосий масалаларга тўхталиб ўтди. 

Унга кўра, Республикамизда фаолият олиб бораётган тренерлар малакасини ошириш, янги ташкил қилинадиган ВМХ йўналиши бўйича махсус бўлимлар очиш ва унга малакали мутахассисларни жалб қилиш, вилоят федерацияларнинг моддий-техник базасини мустаҳкамлаш, Республикамиз бўйлаб халқаро велопойгалар ташкил қилиш, асосийси Токио Олимпиадасига йўлланма олган 2 нафар спортчиларимиз Ольга Забелинская ҳамда Муроджон Холмуродовларни 4 йилликнинг нуфузли мусобақасига пухта тайёрлаш каби мавзулар атрофлича муҳокама қилинди.