Ўзбекистонлик ММА жангчиси Octagon League чемпионлик камари учун жанг қилади

Мусобақанинг иккинчи асосий жанги, яъни co main event'да ўзбекистонлик аралаш якка кураш устаси Сардор Худойбердиев чиқиш қилади.

32 ёшли ҳамюртимизга Қирғизистон вакили Арген Абдикадир Уулу рақиб бўлади. Аҳамитлиси, беллашув ярим енгил вазн тоифасидаги чемпионлик камари учун ўтказилади.

Боиси, қирғизистонлик амалдаги чемпион Муртазали Магомедов ўз камарини вакант қолдириб, енгил вазн тоифасига ўтди. Худойбердиев — Абдикадир Уулу баҳсига қозоғистонлик Кожахмет Имангали захира жангчиси сифатида танлаб олинган.

Маълумот учун, Сардор Худойбердиев фаолияти давомида 11 та жанг ўтказиб, 8 та ғалаба ва 3 та мағлубият қайд этган. У охирги жангини 2024 йил декабрь ойида Саидибрагим Калисбекка қарши ўтказиб, очколар ҳисобига ғалаба қозонган ҳолда бонусга эга чиққанди.

Арген Абдикадир Уулу ҳисобида эса 9 та ғалаба ва 1 та мағлубият мавжуд.