Ўзбекистонлик Олимпиада совриндорининг собиқ рақибида коронавирус аниқланди

Кубалик чемпион шу йилнинг март ойи бошида Канаданинг Оттава шаҳрида ўтказилган Панамерика чемпионатида иштирок этган ва якунда -67 кг вазн тоифасида мусобақа ғолибига айланганди. 

Чемпионат якунланганидан сўнг Куба терма жамоаси Оттавада қолиб, бир ҳафтадан кейин Канаданинг айнан шу шаҳрида старт оладиган Панамерика квалификацион турнирига тайёргарлик кўрди. Бореро ўтган йили Нур-Султан шаҳридаги жаҳон чемпионатида Токио-2020 лицензиясини қўлга киритгани боис бу мусобақада иштирок этмади. 

Кубалик курашчилар 17 март куни Канададан Озодлик оролига қайтишди ва шундан сўнг Исмаэлда инфекция симптомлари аниқланди. 28 март куни эса унинг коронавирусга топширган таҳлили ижобий натижа берди. Ҳозирда Бореро пойтахт Гаванадаги госпиталда даволанмоқда. Олимпиада чемпионининг ҳолати қониқарли дея баҳоланмоқда. 

Исмаэль Бореро билан мулоқот қилган 25 киши назоратга олинди. Улар орасида юнон-рим кураши бўйича Куба терма жамоасининг тўрт нафар аъзоси ҳам бор. Уларнинг барчаси шифокорлар назоратига олинган. 

Эслатиб ўтамиз, Исмаэль Бореро Рио-2016 Олимпиадасининг ярим финалида ҳамюртимиз Элмурат Тасмурадовни мағлубиятга учратиб, финалга йўл олган эди.