Париж-2024 Олимпиадасида стол теннисчиларимиздан ҳеч ким бўлмайди

Афсуски, Марказий Осиё минтақавий саралаш турнири якунланмасидан туриб, Ўзбекистон терма жамоаси стол теннисчилари ўз иштирокларини тўхтатиб бўлишди. Аввалига қизларимиз Розалина Хаджиева ва Марҳабо Магдиева гуруҳ босқичидан чиқа олишмади. Кейин эса йигитларимиз омадсизликка учрашди. 

Эркаклар ўртасидаги баҳсларда Рио-2016 Олимпиадаси иштирокчиси бўлган Зоҳид Кенжаев ҳамда Шоҳруҳ Искандаров 1/4 финалга йўл олишганди. Искандаров эронлик Нима Аламянга 0:4 (1:11, 9:11, 4:11, 9:11) ҳисобида имкониятни бой бериб қўйди. Кенжаев эса 1/4 финалда қирғизистонлик Азамат Эргашевдан 4:1 (11:5, 11:6, 8:11, 11:2, 11:3) ҳисобида устун келганди. Аммо 1/2 финалда эронлик Ношад Аламянга 0:4 (4:11, 9:11, 8:11, 4:11) ҳисобида ютқазиб қўйди. 

Эслатиб ўтамиз, эркаклар ва аёллар ўртасидаги турнирда фақат ғолибларгина Париж-2024 Олимпиадаси лицензиясини қўлга киритади. Финал учрашувлари бугун ўтказилади. 

Эркаклар ўртасидаги финалда икки эронлик стол теннисчиси ўзаро тўқнаш келишини инобатга олсак, лицензия ҳар қандай натижада ҳам форс юртига йўл олади. Аёллар ўртасидаги финалда эса қозоғистонлик Сарвиноз Миркадирова эронлик Неда Шаҳсаварига қарши Олимпиада йўлланмаси учун баҳс олиб боради.