Париж-2024 волонтёрлик дастурига аризалар топшириш бошланди

Ушбу дастур бутун дунё бўйлаб очиқ ва хоҳловчилар унда ўз аризаларини қолдиришлари мумкин.

Таъкидлаш керакки, 2024 йил 26 июлдан 11 августгача бўлган Олимпия ўйинлари ҳамда 28 августдан 8 сентябргача бўлиб ўтадиган Паралимпия ўйинлари давомида жами 45 000 нафар волонтёр тарихий лаҳзаларни ўз кўзлари билан кўриш ва ўйинларни ичкаридан ҳис қилиш имкониятига эга бўлади.

Ушбу 45 000 нафар волонтёр Франциянинг турли жойларида Олимпия ва Паралимпия ўйинларининг барча расмий майдонларида жойлашган бўлиб, тадбирни ўтказишнинг барча соҳаларида муҳим роль ўйнайди. 

Жумладан, томошабинлар ва аккредитациядан ўтган шахсларни кутиб олиш ва уларга йўл кўрсатиш, спорт делегацияларига ёрдам бериш, ҳамроҳлик қилиш, спортчиларни мусобақалар ўтказиладиган жойларга ва матбуот анжуманларига олиб бориш, аккредитациядан ўтган шахсларни ташиш, вақтни ҳисобга олиш фаолиятини қўллаб-қувватлаш, жиҳозларни тақсимлашда иштирок этиш ҳамда тиббий ёрдам кўрсатиш ва бошқалар.