Пекин-2022 қишки Олимпия ўйинлари стартига 49 кун қолди

Айни пайтда ўзбекистонлик спортчиларнинг Пекин-2022 қишки Олимпия ўйинларига тайёргарлиги қизғин давом этмоқда.

Таъкидлаш жоиз, шу кунларда Россияда (Абзаково ва Магнитогорск чанғи марказларида) тоғ чанғиси бўйича саралаш мусобақалари ўтказилмоқда. Шунингдек, ушбу ой охирида вакилларимиз Эронда яна бир турнирда қатнашиши кўзда тутилган.

Пекин-2022 йўлланмаларни қўлга киритишга тоғ чанғиси бўйича терма жамоамиз вакиллари Комилжон Тўхтаев ва Валерия Ковалева асосий даъвогар бўлиб туришибди. Арман Гаюпов ва Раъно Раимқулова уларга захира сифатида тайёрланишмоқда. Қайд этиш жоиз, Халқаро чанғичилар федерацияси сайтида Комилжон Тўхтаев лицензион ҳудудда қайд этилган. Якуний лицензиатлар келаси йилнинг 17 январь куни расман эълон қилинади. 

Регламентга кўра, мазкур йўналишда Ўзбекистон терма жамоаси 2 та йўлланма (1 эркак ва 1 аёл) қўлга киритиши мумкин. Ҳозирда аёллар тоифасидаги квота учун жиддий кураш олиб борилмоқда.

Ўзбекистон чанғи спорт турлари федерацияси томонидан ишлаб чиқилган ва Туризм ва спорт вазирлиги, Ўзбекистон Миллий Олимпия томонидан тасдиқланган тезкор режа асосида спортчиларимиз бўлажак стартларга тайёргарлик олиб боришмоқда. Вакилларимиз Россия, Эрон ва Европа мамлакатларида ўқув-машғулот йиғинлари ҳамда мусобақаларда иштирок этишади. Мазкур тадбирларда бугунги эпидемиологик вазиятдан келиб чиққан ҳолда барча қоидаларга риоя қилинмоқда ва хавфсизлик чоралари таъминланган.

Спортчиларимиз бўлажак Олимпия ўйинларига тоғ чанғисининг слалом ва гигант слалом йўналишларида тайёгарлик кўришмоқда.