Плей-офф: "Ҳумо" жамоасининг 1/2 финалдаги рақиби маълум!

Хабарингиз бор, Тошкентнинг "Ҳумо" хоккей клуби Қозоғистон Очиқ чемпионатида иштирок этмоқда.

Жамоа мунтазам чемпионатни иккинчи ўринда якунлаб, плей-оффга йўл олганди. 22 февраль куни "қанотлилар" чорак финал доирасида "Горняк" жамоасини тўрт ўйин натижасига кўра мағлуб этиб, ярим финал масаласини ҳал этган эди.

Кеча чорак финалдан ўрин олган яна бир баҳсда "Бейбарис" жамоаси "Актобе"ни бешта ўйин натижасига кўра 4:1 ҳисобида мағлубиятга учратди. Шу тариқа, "Ҳумо" ярим финал доирасида "Бейбарис"га қарши баҳс олиб борадиган бўлди. Илк учрашувлар серияси 11-12 март кунлари пойтахтимизда ўтказилади.

Маълумот учун, 3 март куни бўлиб ўтадиган "Номад" - "Арлан" ўйини ғолиби мунтазам чемпионатни биринчи ўринда якунлаган "Сариарка" жамоасига ярим финалда рақиблик қилади.