12 дек 16:06
Янгиликлар

Кураш

Полвонларимиз жаҳон чемпионатида 11 та медаль қўлга киритишди, ҳозирча ФОТОГАЛЕРЕЯ

Россиянинг Қозон шаҳрида белбоғли кураш (борьба на поясах) бўйича катталар ўртасида жаҳон чемпионати бўлиб ўтмоқда.

Мазкур жаҳон чемпионатига пухта ҳозирлик кўрган белбоғли кураш бўйича эркаклар ва аёллардан иборат терма жамоамиз (бош мураббий Аъзамжон Шокиржонов) ҳам муносиб иштирок этишмоқда.

Жаҳон чемпионатида эркаклар белбоғли курашнинг эркин йўналишида 8 та вазн тоифасида, хотин-қизлар эса 5 та вазнда гиламга чиқишмоқда.

Қувонарлиси, 35 давлатдан йиғилган энг сара спортчилар орасида полвонларимиз 3 та олтин, 4 та кумуш, 4 та бронза медалларини қўлга киритишга муваффақ бўлиб, кучлилар қаторидан жой олишди.

Кечаги эркин йўналиш бўйича беллашувларда терма жамоамиз таркибидан жой олган спортчилардан 57 кг. вазн тоифасида Ойбекжон Ҳамидов (Наманган), 68 кг.да Ойбек Султонов (Андижон), 52 кг.да Фарангиз Абдунабиева (Сирдарё)лар барча рақибларини енгиб, олтин медалларни қўлга киритишди.

82 кг.да Ҳусниддин Рўзиев (Андижон), 100 кг.да Аъзамжон Анваржонов (Андижон), +100 кг.да Шерзод Раҳимов (Фарғона), 58 кг.да Манзураой Мўйдинова (Фарғона) кумуш медалларига эга чиқишган бўлса, 62 кг.да Муроджон Раҳимов (Хоразм), 52 кг.да Мадина Акрамова (Андижон), 66 кг.да Земфира Азатова (Қорақалпоғистон), +76 кг.да Анифе Куртсеитова (Андижон)лар учинчи ўринни банд этиб, бронза медаль соҳибларига айланишди.

Биринчи кунги беллашувлар якунига етгач, тантанали тарздаги тақдирлаш маросими бўлиб ўтди. Ғолиб ва совриндорлар медаль, диплом, кубок ва эсдалик совғалари билан тақдирланишди.