Пойтахтимизда "Бутунжаҳон таэквондо куни"га бағишланган фестивал ўтказилди + ФОТОГАЛЕРЕЯ

Жумладан, пойтахтимиздаги "Универсал" спорт мажмуасида "Бутунжаҳон таэквондо куни" муносабати билан фестивал ўтказилди. 

Мазкур сана муносабати билан Тошкент шаҳрида ўтказилган фестивалнинг очилиш маросимида Ўзбекистон таэквондо WT ассоциацияси бош котиби Муроджон Мамадалиев, мамлакатимизда хизмат кўрсатган мураббий Александр Ким, жаҳон чемпиони Дмитрий Шокин сўзга чиқиб, юртимизда таэквондо WT спорт тури йил сайин жадал оммалашаётгани, бунинг натижасида ўзбекистонлик таэквондочилар бир қатор нуфузли турнирларда ғолиб ва совриндорлар қаторидан жой олаётгани, ёш спортчиларнинг улкан марраларни забт этишлари учун давлатимиз томонидан барча имкониятлар яратилганини таъкидлади. Шунингдек, фестиваль қатнашчиларини "Бутунжаҳон таэквондо куни" муносабати билан қутлади.

– "Мен таэквондо WT спорт тури билан шуғулланаётганимдан бери ўзимда ишонч, руҳан тетиклик ҳисларини сезмоқдаман. Спорт менинг ҳаётимнинг ажралмас қисмига айланган. Ҳозирда Яшнабод туманидаги "Leesteam" спорт клубида шуғулланяпман. Орзуим - жаҳон чемпиони бўлиш. Бугунги фестивалда таниқли спортчи ва мураббийларни кўриб қувондим ва улар каби юқори натижаларга эришишни ўз олдимга мақсад қилиб қўйдим", – деди Зулайҳо Турғунбоева. 

Кўтаринки руҳда кечган фестивалда ёш спортчилар томонидан кўргазмали чиқишлар амалга оширилди. Фестивал сўнггида барча иштирокчиларга Ўзбекистон таэквондо WT ассоциацияси томонидан эсдалик совғалари топшилирди.