Пойтахтимизда фестиваль доирасида спорт мусобақалари қизғин давом этмоқда

Ўзбекистон Республикаси Жисмоний тарбия ва спорт вазирлиги ҳамда Миллий олимпия қўмитаси томонидан 10 январь санасидан бошлаб мамлакатимизнинг барча ҳудудлари бўйлаб «Спортни сев, спорт билан яша» шиори остида оммавий спорт мусобақалари бўлиб ўтмоқда.

Фестиваль доирасидаги мусобақалар пойтахтимизда ҳам юқори савияда ўтказилмоқда десак муболаға бўлмайди. Жумладан, Сергели тумани жисмоний тарбия ва спорт бўлими, 1 ва 2-сонли болалар-ўсмирлар спорт мактаби ташаббуси билан маҳаллаларда истиқомат қилаётган турли ёшдаги аҳоли иштирокида шахмат бўйича туман финал босқичи мусобақаси ўтказилди.

Бундан ташқари, Юнусобод туманидаги 1-сонли БЎСМда самбо бўйича очиқ биринчилик бўлиб ўтди. Қизғин ва муросасиз кечган баҳслар якунига кўра, ғолиб ва совриндорлар ташкилотчилар томонидан диплом, медаль ва эсдалик совғалар билан тақдирланишди.

Бу каби мусобақалар республикамизнинг барча ҳудудларида ўтказилмоқда.