Grenke Chess Festival 2026. Абдусатторов ва Якуббоев пешқадамлар сафида. Бугун Нодирбек Магнус Карлсен билан ўйнайди

Мусобақанинг кучлилар жам бўлган Freestyle Open гуруҳида 6 ва 7-тур учрашувлари ортда қолди. Ушбу гуруҳда қатнашаётган гроссмейстерларимиз Нодирбек Абдусатторов ва Нодирбек Якуббоев кечаги партиялардан кейин 7 имкониятдан 5,5 очкодан жамғариб, Топ-10`таликда боришмоқда. Абдусатторов қўшимча кўрсаткичларга кўра 8, Якуббоев 10-ўринни банд этган. 

Еттинчи турда Магнус Карлсен билан дуранг ўйнаган германиялик Винсент Кеймер 6,5 очко тўплаган ҳолда якка пешқадам бўлиб турибди. Сербиялик Алексаей Сарана, француз Максим Вашье-Лаграв ва ҳиндистонлик Пранав 6 очко билан кейинги ўринлардан жой олган. 

Нодирбек Абдусатторов 6-турда қора доналарда германиялик гроссмейстер Даниэль Хасрат, 7-турда россиялик Ян Непомняший билан дуранг ўйнади. Нодирбек Якуббоев эса оқ доналарда украиналик Олександр Бортник билан дуранг қайд этиб, ҳиндистонлик гроссмейстер Кришнан Сасикиранни мағлубиятга учратди. Шамсиддин Воҳидов оқ доналарда германиялик Алжоша Фюрстакка ютқазди, яна бир мезбон шахматчи Микита Волковни ютди.

Бугун тур олдидан Шамсиддин Воҳидов 4,5 очко билан қўшимча коэфицентларга кўра 52, 4 очкога эга Афруза Ҳамдамова 83-ўринда бормоқда. Бироздан сўнг бошланадиган 8-турда Нодирбек Якуббоев норвегиялик шахмат афсонаси Магнус Карлсенга қарши оқ доналарда ўйнайди. Абдусатторов эса қора доналарда франциялик Гата Камский билан ҳисоб-китоб қилади. Шамсиддин Воҳидов ҳиндистонлик Сива Маҳадеван, Афруза Ҳамдамова германиялик Марк Мейерс билан тўқнаш келади.