16 ноя 08:03
Янгиликлар
Total Chess. Абдусатторов иштирок этган турнирда 1/2 финалчилар аниқланди
Уч хил вақт назорати, 24 нафар иштирокчи 11 кун давомида Total Chess World Championship Tour бош соврини учун баҳс олиб бормоқда. Гроссмейстерлар 4 та гуруҳга бўлиниб, Fast Classic форматида курашга киришишди. Беш кун давом этган баҳсларда гуруҳ босқичидаги ғалаба учун 3, дуранг учун эса 1 очко берилди.
Афсуски, Нодирбек Абдусатторов "А" гуруҳидаги учрашувларни ўта омадсиз ўтказди ва якунда олти иштирокчи орасида сўнгги 6-ўринни эгаллади. Кеча гуруҳ босқичининг сўнгги куни у америкалик Эндрю Ҳонгга қарши ўтказилган ҳар икки партия учрашувида ҳам дурангга имзо чекди.
Тўққиз очко жамғарган Нодирбек гуруҳ аутсайдери сифатида саралашни якунлади. Бу гуруҳда 15 очко билан биринчи ўринни эгаллаган Алиреза Фирузджа 1/2 финалга йўл олди. Унинг финал остонасидаги рақиби АҚШ вакили Фабиано Каруана бўлади.
Энди 24 шахматчи олтита сеткада якуний ўринлар учун курашади. Чемпион 1-сеткада аниқланади: Максим Ваше-Лаграв Аниш Гирига, Алиреза Фирузжа эса Фабиано Каруанага қарши ўйнайди. Қолган сеткаларда 5–24-ўринлар тақсимланади.
Нодирбек Абдусатторов 6-сеткада ҳиндистонлик Рамешбабу Прагнанандҳа билан тўқнашади. Бу сеткада 21–24-ўринлар аниқланади. Ушбу плей-офф босқич ўйинлари эртага бошланади. Унда шахматчилар бир-бирига қарши блиц, рапид ва Fast Classic форматларида ўйнайди. Мусобақа 20 ноябрь куни якунланади.
Мусобақанинг умумий мукофот жамғармаси — 650 000 АҚШ доллари. Турнир ғолиби 80 000 долларни қўлга киритади. 2027 йилда расман йўлга қўйиладиган Total Chess жаҳон чемпионати турининг илк синови айнан Будапештда бўлиб ўтади.



Фикрлар