Президент Қарори ҳамда Жаҳон чемпионатига тайёргарлик масаласи муҳокама қилинди

Дунёнинг юздан зиёд давлати дзюдочилари иштирокида ўтадиган жаҳон чемпионатини юқори савияда ташкил этиш, юртимизга келадиган меҳмонлар учун барча қулайликларни муҳайё этиш, уларнинг яхши таассуротлар билан қайтишлари учун ҳозирданоқ зарурий чора-тадбирлар кўрилмоқда. 

Ўзбекистон дзюдо федерациясида ўтган жаҳон чемпионати ишчи гуруҳининг навбатдаги йиғилишида ҳам ушбу масалалар атрофлича муҳокама қилинди. 

Жаҳон чемпионати иштирокчилари, фахрий меҳмонлар, делегацияларни кутиб олиш ҳамда меҳмонхоналарга жойлаштириш, уларга юқори сервис хизматини кўрсатиш масалалари кўриб чиқилди. Мусобақа логоси, меҳмонларга бериладиган эсдалик совғалари муҳокама қилинди.  

Шунингдек, куни кеча эълон қилинган "Ўзбекистонда Дзюдо спорт турини янада ривожлантириш чора тадбирлари тўғрисидаги" Президент Қарорининг ҳар бир банди бўйича ҳам фикр алмашилди, масъулларга тегишли топшириқлар берилди.