Проф кикбоксчиларимиз 4 та жангдан 3 тасида ғалаба қозонишди + ФОТОГАЛЕРЕЯ

Кеча тунда ҳаваскорлар ўртасидаги финал беллашувлари якунланганидан сўнг навбат проф жангларга берилди. Жами 4 та профессионал жанглар ўтказилди ва уларнинг учтасида ўзбекистонлик кикбоксчилар ғалаба қозонишди. 

Марказий жангда ҳамюртимиз Муродбек Азимов хорватиялик жаҳон чемпиони Иван Бертичга қарши рингга кўтарилди. Уч раунд тўлиқ давом этган муросасиз жангда Азимов номдор рақибини 2:1 ҳисобида мағлубиятга учратди. Азимов махсус камар билан бирга 1000 евро мукофот пулини ҳам қўлга киритди. 

Загреб шаҳрида туғилган 21 ёшли Бертич муайтай бўйича жаҳон ва Европа чемпиони, кикбоксингнинг К-1 йўналишида жаҳон чемпиони ҳисобланади. Кеча у профессионал кикбоксингда дебют жангини ўтказди. 

"Тилла бола" номи остида ўз жангларини ўтказиб келаётган 32 ёшли андижонлик Азимов эса профессионаллар ўртасида кикбоксингнинг К-1 йўналишида Осиё чемпиони, шу йил Туркияда ўтказилган WAKO Лоу-кик йўналишида жаҳон чемпиони эди. 

Оғир вазн тоифасида кечган яна бир қизиқарли жангда ҳамюртимиз Ҳусанхон Баратов туркиялик Меҳмет Ўзерни сўнгги учинчи раунд якунланиши арафасида техник нокаутга учратди. Халқаро тоифадаги рефери Темур Муҳаммаджонов тўртинчи нокдаун ҳолатидан сўнг жангни тўхтатишга мажбур бўлди.   

Яна бир ҳамюртимиз Темурбек Холматов мисрлик Абдуллоҳ Мандодан устун келган бўлса, қўл жанги бўйича жаҳон чемпиони Гулжаҳон Норматова профессионал кикбоксдаги дебют жангида украиналик тажрибали спортчи Мария Белкинага имкониятни бой бериб қўйди. Мария-Катерина Белкина 2021 йилги жаҳон чемпионати ҳамда жаҳон кубоги совриндори ҳисобланади.

Суратлар муаллифи - Алимурод МАМАДАМИНОВ, ўз мухбиримиз