Қарши “Фьючерс”. Файзиев ва Каримов чорак финалда

Соврин жамғармаси 25 000 АҚШ долларини ташкил қилувчи мусобақада иккинчи давра учрашувлари якунланиб, чорак финалга йўл олган саккиз теннисчининг номи маълум бўлди. Улардан икки нафари ўзбекистонлик теннисчилардир. 

Истеъдодли теннисчимиз Жўрабек Каримов турнирнинг саккизинчи ракеткаси украиналик Владислав Манафовни икки сетда ҳам бир хил 6:4 ҳисобида мағлуб этди. Энди у турнирда биринчи рақам остида таснифланган япониялик Хироки Морияга қарши кортга чиқади.

Мамлакатимизнинг иккинчи ракеткаси ҳисобланган Санжар Файзиев эса россиялик Владимир Поляковдан 7:6(2), 6:2 ҳисобида устун келди. Унинг ярим финал остонасидаги рақиби турнирнинг иккинчи рақамли теннисчиси россиялик Константин Кравчук бўлади. Кравчук иккинчи даврада ёш теннисчимиз Ҳумоюн Султоновни 7:5, 6:4 ҳисобида енгди.