Қоч Ўзбекистон келяпти: Богдан Гусков тарихий имконият остонасида, Рамазон Темиров эса ўз йўлини давом эттиради (мутолаа учун)

Бу галги оқшом ўзбекистонлик ММА мухлислари учун алоҳида аҳамиятга эга. Чунки турнирда бир эмас, икки нафар вакилимиз октагонга кўтарилади. Энг муҳими, Богдан Гусков фаолиятидаги энг катта жангни ўтказса, Рамазон Темиров UFC'дан навбатдаги муҳим синовини қабул қилиб олади.

Бир телефон қўнғироғи — бутун фаолиятни ўзгартириши мумкин

Дастлаб Магомед Анкалаевнинг рақиби Халил Раунтри бўлиши режалаштирилган эди. Бироқ америкалик жангчи жароҳат туфайли турнирдан чиқиб кетгач, UFC қисқа муддат ичида унинг ўрнига муносиб рақиб излади. Танлов эса Ўзбекистон шарафини ҳимоя қилаётган Богдан Гусковда тўхтади.

Бу қарор Гусков учун оддий алмаштириш эмас. У биринчи марта UFC турнирининг марказий жангида иштирок этади. Бу эса нафақат катта эътибор, балки дивизионнинг энг юқори поғоналарига чиқиш учун улкан имконият ҳамдир. Яна бир факт: бу нафақат Богдан, балки бутун Ўзбекистон тарихида ҳамюртларимизнинг илк марта UFC Main Event'ида иштирок этиши бўлади. Айнан мазкур жангда ғалаба қозониш орқали Богдан кейинги баҳсда чемпионлик камари учун жанг қилиш имконини қўлга киритиши эҳтимоли юқори.

Анкалаев — дивизионнинг энг хавфли рақибларидан бири

Магомед Анкалаев сўнгги йилларда ярим оғир вазн тоифасидаги энг барқарор жангчилардан бири сифатида эътироф этилади. Самбо мактаби ва кучли грэпплингга эга россиялик файтер узоқ вақт чемпионлик учун курашиб келди ва дивизионнинг энг кучли вакиллари билан жанг қилди. Унинг услуби хавфсизликка асосланган бўлса-да, ҳар қандай хатони жазолай оладиган юқори даражадаги техникага эга.

34 яшар атлет 24 та жанг ўтказган бўлса, улардан 21 тасида ғалаба қозонган, 2 тасида мағлуб бўлган ва яна бир жангда дурангга рози бўлган. Магомед мағлубиятларидан бирини айнан сўнгги жангида қабул қилиб олди. Тарих аламли. У 2025 йил март ойида бразилиялик Алекс Перейрани очколар ҳисобига кўра мағлуб этиб, ярим оғир вазнда UFC чемпионлигини қўлга киритганди. Аммо ўша йилнинг 4 октябрь куни ҳаммаси ўзгариб кетди. Реванш жангида Перейра Анкалаевни биринчи раунднинг ўзида даҳшатли нокаутга учратди ва Магомеддан титулни тортиб олди. Анкалаев Абу-Дабига айнан мана шундай аламзадалик билан етиб келяпти. Бу аламзадалик манзили аслида Халил Раунтри бўлиши керак эди, аммо Богдан Гусков яна бир марта таваккалчи эканини кўрсатди.

Ангренлик Гусков нимаси билан хавфли?

Богдан Гусков эса мутлақо бошқача услубдаги жангчи. Унинг иштирокидаги деярли ҳар бир жанг мухлисларга томоша тақдим этади. Агрессив прессинг, кучли зарбалар ва муддатидан олдин ғалаба қозониш қобилияти унинг асосий қуроли ҳисобланади.

UFC'га келганидан бери ўзбекистонлик файтер бир нечта муҳим ғалабаларни қўлга киритди ва ярим оғир вазнда ўзини жиддий рақобатчи сифатида намоён қилди. Энди эса унинг олдида рейтингнинг юқори қисмига сакраш, титул учун жанг қилиш имконияти пайдо бўлди. Агар Гусков Анкалаевни мағлуб эта олса, чемпионлик пойгасига энг яқин номзодлардан бирига айланиши мумкин.

Қисқа тайёргарлик — энг катта синов

Албатта, бу жангнинг мураккаб жиҳати ҳам бор. Гусков рақиб алмашганидан кейин жуда қисқа вақт ичида тайёргарлик кўришга мажбур бўлади. У дастлаб 1 август куни Польша вакили, афсонавий собиқ чемпион Ян Блаховичга қарши реванш жангини ўтказиши режалаштирилгади. Бироқ UFC таклифи келгач, бутун режалар ўзгарди ва у Анкалаевга қарши асосий жангга розилик билдирди.

Чунки бундай имконият ҳар доим ҳам учрамайди. Аммо айнан шу Богдан учун энг катта синовга айланади. Худди бир пайтлар Волкан Оздемирга қарши бўлгани каби.

Темиров ҳам диққат марказида

Абу-Дабида яна бир ўзбекистонлик жангчи — Рамазон Темиров ҳам октагонга чиқади. Ўта енгил вазн тоифасида ҳаракат қилаётган Темиров UFC'даги ҳар бир чиқиши билан ўз нуфузини ошириб бормоқда.

Тезкорлиги, юқори темпда ишлаши ва ҳужумкор услуби билан ажралиб турадиган Рамазон Темиров Абу-Дабида австралиялик титул учун собиқ даъвогар Стив Эрцег билан беллашади.

Уларнинг жанги co main event мақомида ўтади.

Дастлаб, ўзбекистонлик мухлислар фақатгина Рамазоннинг жанги учун 25 июль санасини кутишган бўлса, энди бу сана ҳамюртларимиз учун тарихийга айланади. Боиси, бунгача ҳеч қачон икки жангчимиз UFC'нинг бир турнирида иштирок этишмаганди.

Ўзбекистон учун тарихий оқшом

Сўнгги икки йилда ўзбекистонлик жангчилар UFC'да тобора кўпроқ кўзга кўрина бошлади. Нурсултон Рўзибоев, Богдан Гусков, Рамазон Темиров каби файтерлар дунёнинг энг кучли лигасида мамлакат байроғини муносиб ҳимоя қилиб келмоқда. Ҳозирда Рамазондан ташқари ҳар икки вакилимиз Лига рейтингидан жой олган. Темиров эса бир йиллик допинг туфайли бу рейтингни вақтинча тарк этишга мажбур бўлди. Аммо Эрцег устидан қўлга киритиладиган ғалаба ҳамюртимизни рейтингга қайтишини кафолатлайди.

25 июль куниги турнир эса бу жараённинг яна бир муҳим босқичига айланиши мумкин. Агар Гусков сенсация қайд этса, у ярим оғир вазнда чемпионлик учун асосий даъвогарлар сафидан жой олиши мумкин. 

Абу-Даби турнирида икки нафар ўзбекистонлик жангчининг бир кечада октагонга чиқиши мухлислар учун катта воқеа. Энди барча нигоҳлар 25 июль куни "Etihad Arena"га қаратилади. Ўша кеча нафақат икки жангчи, балки бутун ўзбек ММА мактаби учун муҳим имтиҳон бўлади.