27 май 08:03
Янгиликлар

Шахмат

Қосимжонов 15 ёшли гроссмейстеримизни енга олмади, пешқадамлик қўшниларимизга ўтди ФОТОГАЛЕРЕЯ

Пойтахтимиздаги халқаро шахмат академиясида ўтказилаётган Жаҳон кубоги учун Марказий Осиё саралаш мусобақаси ўзининг ҳал қилувчи палласига кирди.

Кеча куннинг иккинчи ярмида мусобақанинг олтинчи тур учрашувлари ўтказилди. Турнирда биринчи рақам остида сараланган Рустам Қосимжонов ушбу турда оқ доналарда ҳаракат қилди. 17-жаҳон чемпиони 15 ёшли халқаро гроссмейтеримиз Нодирбек Абдусатторов билан дурангга имзо чекди.

Қосимжоновнинг очко йўқотишидан қозоғистонлик гроссмейстер Ринат Жумабоев унумли фойдаланиб қолди. Жумабоев қора доналарда ўйнашига қарамай, ҳамюртимиз Шамсиддин Воҳидовни мағлуб этди ва 4,5 очко билан якка пешқадамга айланиб олди.

Бу турда ёш шахматчимиз Ортиқ Ниғматов қозоғистонлик халқаро гроссмейстер Ануар Исмагамбетов билан дуранг қайд этди. Халқаро гроссмейстеримиз Жаҳонгир Воҳидов эса қора доналарда ўйнаб, қозоғистонлик халқаро гроссмейстер Нурлан Ибраевни таслим этди.

Ёш гроссмейстеримиз Жавоҳир Синдаров тажрибали гроссмейтеримиз Марат Жумаевга ютқазиб қўйди. Бугун 7-турда пешқадам Ринат Жумабоев ҳамюртимиз Нодирбек Ёқуббоевни синовдан ўтказади. Рустам Қосимжонов қора доналарда Ануар Исмагамбетов билан ҳисоб-китоб қилади. Нодирбек Абдусатторов қозоғистонлик гроссмейстер Пётр Костенкога қарши баҳс олиб боради.

Бугунги партиялар олдидан Ринат Жумабоев 4,5 очко билан якка пешқадам бўлиб турибди. Пётр Костенко, Рустам Қосимжонов, Ортиқ Ниғматов, Нодирбек Абдусатторов, Нодирбек Ёқуббоев ва Ануар Исмагамбетов ҳисобида 4 тадан очко бор.