Қосимжоновда яна дуранг, беш нафар шахматчи пешқадам

Кеча куннинг иккинчи ярмида мусобақанинг бешинчи  тур учрашувлари ўтказилди. Турнирда биринчи рақам остида сараланган Рустам Қосимжонов ушбу турда қора доналарда ҳаракат қилди. 17-жаҳон чемпиони қозоғистонлик Ринат Жумабоев билан дурангга имзо чекди. 

Бу тур олдидан якка пешқадам бўлиб турган шахматчимиз Ортиқ Ниғматов ёш гроссмейстеримиз Нодирбек Абдусатторовга имкониятни бой берди. Яна бир гроссмейстеримиз Жаҳонгир Воҳидов қозоғистонлик халқаро гроссмейстер Ануар Исмагамбетовга ютқазиб қўйди. 

Ёш гроссмейстеримиз Жавоҳир Синдаров қора доналарда ўйнаб, тожикистонлик Муҳаммад Хусанхўжаевга имкониятни бой берди. Бугун 6-турда Рустам Қосимжонов оқ доналарда Нодирбек Абдусатторовга қарши баҳс олиб боради. Ортиқ Ниғматов эса Ануар Исмагамбетов билан ҳисоб-китоб қилади.

Бугунги партиялар олдидан Ринат Жумабоев, Рустам Қосимжонов, Ортиқ Ниғматов, Нодирбек Абдусатторов ва Ануар Исмагамбетов 3,5тадан очко жамғариб, пешқадамлик қилишяпти. Қўшимча кўрсаткичларга кўра Жумабоев биринчи ўринни эгаллаб турибди.