Қозоғистонлик икки нафар таниқли боксчи допинг сабаб дисквалификация қилинди

Бокс бўйича Қозоғистон терма жамоасида допинг билан боғлиқ можаро юз берди. Қозоғистон Миллий антидопинг маркази хабарига кўра, 2022 йилги Осиё чемпионати бронза медали соҳиби Саматали Толтаев анаболик стероид бўлган оралтуринаболни қўллагани учун 2026 йилнинг 31 мартигача дисквалификация қилинган.

Яна бир қозоғистонлик боксчи Серик Абзал метастерондан фойдалангани учун у 2026 йилнинг 7 апрелигача дисквалификация олди. Серик шу йил Таиланд пойтахти Бангкок шаҳрида 22 ёшгача бўлганлар ўртасидаги Осиё чемпионатида кумуш медални қўлга киритган.