02 июн 10:41
Янгиликлар

Бокс/ММА

Қозоқ бокси "барби"си рақибасини нокаутга учратиб, камарини ҳимоя қилди

Аёллар ўртасида ўта енгил вазн тоифасида фаолият олиб борувчи қозоғистонлик проф боксчи Ангелина Лукас навбатдаги жангини ўтказди.

У Қозоғистоннинг Тараз шаҳрида бўлиб ўтган бокс кечасининг марказий жангида рингга кўтарилиб, Чили вакиласи Даниэла Асенхога қарши баҳс олиб борди. Ҳар бири икки дақиқадан иборат 10 раундлик жанг Лукас эгалик қилиб турган IBO чемпионлик камари учун ўтказилди.

Жангнинг олтинчи раунди якунланган бир паллада Асенхонинг бурчаги баҳсни давом эттиришдан бош тортди. Шундай қилиб, Лукас 2023 йил октябрь ойидаги мағлубият учун Асенходан реванш олди.

Энди чилилик чарм-қўлқоп устаси ҳисобида жами бешта мағлубият мавжуд. Лукаснинг янги рекорди эса 15-1 кўринишида. 28 яшар Ангелина IBO чемпионлик камарини 2024 йил октябрь ойида Бангкокда қўлга киритган эди.