Rafa Nadal Open. Cултонов саралаш турнирининг финалига йўл олди

Мукофот жамғармаси 74,825 еврони ташкил этувчи ушбу турнирда ҳамюртимиз Ҳумоюн Султонов ҳам ўз омадини синаб кўрмоқда. Rafa Nadal Open by Movistar турнири теннис афсонаси Рафаэль Надаль томонидан ташкил этилаётгани билан ҳам аҳамиятли ҳисобланади. 

Саралаш баҳсларида биринчи рақам остида таснифланган Султонов 1/2 финалда италиялик Фабрицио Андалорони 6/3, 6/1 ҳисобида мағлубиятга учратди. Юртдошимиз 6 та эйс, 4 та брейк қайд этиб, 1 та қўшхатога йўл қўйди. Бу теннисчиларнинг ўзаро иккинчи учрашуви эди. Бир ҳафта аввал Португалиядаги турнирда ҳам Ҳумоюн италиялик рақибини таслим этганди.  

Таққослаш учун, Ҳумоюн Султонов ATP рейтингида 264, Андалоро 595-ўринни эгаллаб турибди. Бугун теннисчимиз асосий тўрга йўлланма берувчи саралашнинг финал учрашувида рейтингнинг 493-поғонасида бораётган франциялик Саша Геймар Вайенбургга қарши кортга чиқади. Бу учрашув бизнинг вақт билан соат 13:00да бошланади. Саша 1/2 финалда саралашнинг еттинчи ракеткаси, ҳиндистонлик Рамкумар Раманатханни 6/1, 6/4 ҳисобида енгди.