Rafa Nadal Open. Ҳумоюн Cултонов асосий тўрга йўл олди

Мукофот жамғармаси 74,825 еврони ташкил этувчи ушбу турнирда ҳамюртимиз Ҳумоюн Султонов ҳам муваффақиятли одимлаяпти. Rafa Nadal Open by Movistar турнири теннис афсонаси Рафаэль Надаль томонидан ташкил этилаётгани билан ҳам аҳамиятли ҳисобланади. 

Саралаш баҳсларида биринчи рақам остида таснифланган Султонов 1/2 финалда италиялик Фабрицио Андалорони 6/3, 6/1 ҳисобида мағлубиятга учратганди. Юртдошимиз бироз аввал якунланган саралашнинг финал учрашувида рейтингнинг 493-поғонасида бораётган франциялик Саша Геймар Вайенбургни 6/4, 6/4 ҳисобида таслим этди. 

Таққослаш учун, Ҳумоюн Султонов ATP рейтингида 264-ўринни эгаллаб турибди. Иккала теннисчи ҳам бугунги учрашувда 6 тадан эйс зарбасини амалга оширган. Ҳумоюн қўшхатога йўл қўймади. Сашада эса бу нохуш статистика 6 тани ташкил қилди.  Султоновнинг асосий тўр илк даврасидаги рақиби кейинроқ маълум бўлади.