Расман! Андерсон Сильва ва Крис Вайдмэн ўртасидаги учинчи жанг эълон қилинди

Олти раундга мўлжалланган бокс жанги 14 ноябрь куни АҚШнинг Майамисида бўлиб ўтадиган турнир кардига киритилди. Унда жангчиларга Жейк Пол ва Жервонта Дэвис мураббийлик қилади.

"Андерсон ва унинг жамоаси Жейк Пол ва Дэвиснинг "Танк" жанги эълон қилинганидан сўнг дарҳол мен билан боғланиб, ушбу тадбирда иштирок этишни хоҳлашларини, Андерсон эса Крис Вайдмэн билан жанг қилишни хоҳлашини айтишди. Иккала томон ҳам ушбу жангни ва айнан профессионал жангни хоҳлаётгани маълум бўлгач, биз уларнинг тарихини, турли авлодларнинг кенгроқ аудиториясини жалб қилиш ва Бразилиядаги тадбирга қизиқишни ошириш имкониятини ҳисобга олган ҳолда ғояни тўлиқ қўллаб-қувватладик", - деди "Most Valuable Promotions" промоутерлик компанияси бош директори Накиса Бидариан ESPN’га берган интервьюсида.

Эслатиб ўтамиз, 2013 йил июль ойида Крис Вайдман Андерсон Сильвани иккинчи раундда нокаутга учратиб, чемпионлик камарини тортиб олганди. Ўша йилнинг декабрь ойида бразилиялик америкалик билан тўқнашувда иккинчи раундда оёғини синдириб олиб, яна мағлубиятга учради.

"Крис билан яна жанг ўтказишдан жуда хурсандман. Биз умумий тарихга эгамиз ва 14 ноябрь куни Netflix’да жонли эфирда унинг яна бир бобини ёзамиз. Бу мухлислар учун томоша бўлади!", - деди Сильва.

"Мен боксда мағлубиятга учрамаганман ва 14 ноябрь куни Netflix’да жонли эфирда бу анъанани давом эттираман. Мен ўргимчакларнинг туғма қотилиман", - деди Вайдмэн янгиликка изоҳ бериб.