Райан Гарсия Исаак Крусга қарши жанг қилишни истайди

Ижтимоий тармоқ юлдузи, бокс мухлисларининг севимлисига айланган Райан Гарсия 1998 йилда Американинг Калифорния штатида туғилган. Болалигидан боксга қизиқа бошлаган Райан етти ёшидан бокс мактабига бора бошлайди. Оз муддатдан кейин у хаваскор боксда жанг қилган. 

У ерда ёш Райан хозирги енгил вазннинг WВC чемпиони Девин Хейни билан олти бор тўқнаш келади ва уларнинг учтасида ғалаба қозонади. Қолган учтасида Девиннинг қўли баланд келган. Шунинг учун Гарcия хар қандай ҳолатда Девин билан профессионал рингда жанг қилишга тайёр эканлигини кўп бора таъкидлаган. 

Профессионал боксга илк қадам

2016 йил у профессионал боксда дебют қилади ва ёш бўлишига қарамай, Райан биринчи раунддаёқ мексикалик Эдгар Мезани нокаутга учратади. У ҳозиргача 21та жанг ўтказиб, уларнинг 18тасида нокаут қайд этган . Бу билан у тўхтаб қолмоқчи эмас. Жисмоний тарафлама Гарсия анча тезкор, чидамли ва оғир зарбага эга боксчи. 

Кэмпбелл билан кечган муросасиз жанг 

Сўнгги жангида Гарсия енгил вазнда вақтинчалик WВC  чемпиони британиялик Люк Кэмпбелл билан тўқнаш келди. Жанг Райан учун кутилмаган тарзда бошланди. Иккинчи раундда Кэмпбелл Гарсияни нокдаун ҳолатига тушириб қўйди. Аммо 24 ёшли чарм қўлқоп устаси ўзининг жисмоний тарафдан кучли эканлигини исботлай олди ва тезда ўрнидан турди. Кэмпбелл яна зарбалар йўллашдан тўхтамади. Ушбу жанг америкалик боксчи учун осон кечмади. Шунга қарамай, у еттинчи раундда британиялик рақибини техник нокаутга учратди ва вақтинчалик WВC чемпионига айланди.

Гарсия Исаак Крус билан жанг қилишни истайди

Турган гап, эндиликда истеъдодли боксчи чемпионлик камарини қўлга киритишга ҳаракат қилади. Бунинг учун у WВC чемпиони Девин Хейни билан жанг қилмоқчи. Аммо Хейнигача америкалик боксчи Исаак Крус билан жанг қилиш нияти борлигини ижтимоий тармоқларда яширмаган. 

Хўш! Бу жанг амалга ошса Гарсияга анча қийин бўлиши аниқ. Сабаби жаҳон рейтингида 8-ўринни банд этиб турган мексикалик жангчи, Исаак Крус анчагина жиддий рақиб. Профессионал боксда Крус 25та жангида 22 ғалаба, 2 мағлубият ва 1 дуранг қайд этган. Жисмоний тарафдан олиб қарасак, мексикалик чарм қўлқоп устаси аниқ ва тезкор зарбалар эгаси. Химоя масаласида ҳам Крус тахмин қилинаётган рақиби Гарсияга бош оғриқ бўлади. Икки бир бирига қарама-карши боксчилар ўртасидаги жанг қизиқарли ўтиши аниқ. Бу жанг ташкил этилса, енгил вазн анчагина қизиқарли тус олиши мумкин. Хозирда Райан Гарсия WBC рейтингида Ломаченкодан кейин иккинчи ўринда бормоқда.

Камрон Ҳасанов тайёрлади