Райан Гарсия Хейнига қарши жанг олдидан вазн меъёрини бажара олмади

Кечанинг марказий жанги биринчи яримўрта вазн тоифаси чемпионлиги учун Девин Хейни (31-0, 15 KO) ҳамда Райан Гарсия (24-1, 20 KO) ўртасида бўлиб ўтади. Бугун тарозидан ўтиш ҳамда сўнгги face to face маросимлари ташкил этилди. Хейни биринчи ярим ўрта вазнда WBC чемпиони бўлиб турибди. 

Эътиборлиси, марказий жанг иштирокчиси Райан Гарсия тарозида белгиланган вазн меъёрини бажара олмади. Гарсия кўпи билан 63,5 кг вазн кўрсатиши керак эди. Лекин у белгиланган меъёрдан 1,4 кг кўп тош босди. Биздаги маълумотларга кўра жангда Хейнига тегишли WBC камари ўртага қўйилмайди. Девиннинг жамоаси Гарсиядан ҳар бир ортиқча фунт учун 500 минг доллар жарима талаб қилмоқда. 

Маълумот учун, америкалик 25 ёшли Райан Гарсия профессионал боксда 2016 йилда дебют қилган. 2021 йилнинг январида вақтинчалик WBC камари учун британиялик Люк Кэмпбеллга қарши жанг ўтказиб, рақибини нокаутга учратганди. 2023 йилнинг апрелида фаолиятидаги илк ва ҳозирча ягона мағлубиятини қабул қилиб олган. Бир йил олдин у учта вазн чемпиони Жервонта Дэвисга нокаут билан ютқазиб қўйганди.

Девин Хейни эса сўнгги жангини ўтган йилнинг декабрь ойида ҳамюрти Режис Прогрейсга қарши ўтказганди. Ўша жангда у ғалаба қозониб, биринчи яримўрта вазн тоифасидаги WBC чемпионлик камарини қўлга киритганди. Эртанги проф бокс оқшоми DAZN PPV пуллик платформасида трансляция қилинади.