Регби ва чим устида хоккей спортининг мутасаддилари билан онлайн учрашув

Кеча МОҚ ҳамда Жисмоний тарбия ва спорт вазирлиги раҳбарияти регби ҳамда чим устида хоккей федерациялари мутасаддилари билан онлайн учрашувда мазкур спорт турларини янада ривожлантириш борасида фикр алмашишди.

Регби юртимизда нисбатан ёш, чим устида хоккей эса ўтмишда шонли тарихга эга спорт тури ҳисобланади. Зеро, Собиқ Иттифоқ даврида “Андижанка” жамоаси чим устида хоккей бўйича бир неча бор мамлакат чемпиони бўлган, терма жамоанинг асосини ушбу клуб ўйинчилари ташкил этарди. Спортчилармиз эса жаҳон чемпионати ва Олимпиадаларда иштирок этиб этиб келишган.

Бироқ бугунги даврга келиб, ҳар икки спорт турида бошқа ўйин спорт турларида бўлгани каби асосий терма жамоанинг мунтазам шуғулланиши учун сифатли майдоннинг йўқлиги, ўқув-машғулот йиғинларининг доимий ташкил этилмаслиги каби муаммоли масалалар бонг уриб келган. Бугун терма жамоа таркибини яна бир карра саралаб, уларнинг шуғулланишлари учун қулай шарт-шароитлар яратиш, инвентар ва йиғинлар учун етарли маблағлар ажратиш каби масалалар муҳокама қилинди. Ўз навбатида МОҚ раҳбари мазкур йиғилиш борасида ўз фикрларини билдириб ўтди.

“Йиллар давомида шундай ажойиб спорт турларини бироз беэътибор қолдириб келганмиз. Спортчилар учун майдон топиш, ҳақиқатда ҳам, асосий масалалардан бири. Мураббийларимиз ва федерация мутасаддилари керакли жойларни танлаб олишса, майдон топиш масаласини ҳал қилишга ёрдам берамиз. Кейинги қадамда вилоят бўлимлари фаолиятини кучайтириш керак. Шунда терма жамоани янада кучайтириш мумкин”, – деди Рустам Шоабдураҳмонов.

Учрашув давомида МОҚ ҳамда Жисмоний тарбия ва спорт вазирлиги раҳбарияти спортчиларнинг карантин қоидаларига амал қилган ҳолда машғулотларни давом эттиришларини сўраб қолишди.