Рэпер Дрейк Нганну - Жошуа жангига 615 000 доллар тикди

У аксарият "ставка"ларда ютқазади. Бу сафар ҳам Дрейк ўз анъанасига содиқ қолди. Рэпер бугун тунда ўтказиладиган Фрэнсис Нганну ва Энтони Жошуа ўртасидаги жангга катта пул тикди. Дрейк Саудия Арабистони пойтахти Ар-Риёд шаҳрида ўтадиган ушбу жангда Нганнунинг ғалаба қозониши учун 615 000 АҚШ доллари "ставка" қилди. 

Агар камерунлик собиқ UFC чемпиони бугунги жангда ғалаба қозона олса, Дрейк ўз ҳамёнини деярли икки миллион долларга бойитиб олади. Фрэнсиснинг ғалабасига 3.10 коэфицент берилган.  

Эслатиб ўтамиз, ўтган йилнинг сентябрь ойида Дрейк Исраэль Адесаньяга рақиби Шон Стриклендни нокаут қилиши учун 500 000 доллар, декабрь ойида эса Леон Эдвардснинг Колби Ковингтонни муддатидан аввал мағлуб этишига 250 000 доллар тиккан эди. Шу йилнинг январида у яна 700 000 доллар ютқазди. Рэпер Стрикленднинг Дрикус Дю Плессини мағлуб этишига пул "ставка" қилганди.

Бу ҳаммаси эмас, Дрейк Конор Макгрегор, Жозе Альдо, Камару Усман, Жастин Гэтжи, Хорхе Масвидал, Энтони Жошуа иштирокидаги жангларга ҳам пул тикиб, катта миқдорда ютқазиб қўйган эди.