Рио-2016 Олимпиадасининг сўнгги кунида ўзбекистонлик спортчилар 4 та медал қўлга киритишди

00:45. Олимпиаданинг ёпилиш маросими бугун Тошкент вақти билан соат 04:00 да бошланади.

00:10. Шу тариқа спортчиларимиз учун Олимпиада ўйинлари якунланди! Ҳали Рио-2016 ўйинларига атаб кўплаб қизиқарли статистикалар, таҳлиллар, суратлар ва видеоларни сизларга атаб қўйганмиз. Шундай экан, сайтимиздан узоқлашманг! Риода бўлиб ўтган Олимпиада ўйинларини сизларга тезкорлик билан етказиб беришда Камолиддин Алимов, Азиз Тўхтамуродов ҳамда Нарзулла Сайдуллаевлар жонбозлик кўрсатишди. Эътиборингиз учун раҳмат! Бизни кузатишда давом этинг! Кетиб қолиш йўғ-а? :)

23:55. Фазлиддин Ғоибназаровга олтин медал топширилмоқда. Бугун Бразилиядаги бокс залига йиғилган мухлислар кетма-кет икки марта Ўзбекистон мадҳиясини тинглашади. Мана шунга мажбур қила олишди бизнинг азаматлар! Раҳмат сизларга!

23:38. Бугуннинг ўзида 2 та олтин, 2 та бронза медалини қўлга киритдик. Бунақаси бўлмаган! Умумий ҳисобда 13 та медал! 4 та олтин, 2 кумуш, 7 бронза медаллари! Қойил! Умумий рейтингда 21-ўринга чиқиб олдик! 

23:25. Фазлиддин Ғоибназаров эса... ҒАЛАБА ҚОЗОНДИ! УРААААА!!! НАВБАТДАГИ ОЛТИН МЕДАЛ! ҒАЛАБА МУБОРАК ЎРТОҚЛАР!

23:15. Магомед Ибрагимов бронза медали соҳиби!

23:12. Жанг бошланди. Навбатдаги олтин сари олға, Фазлиддин!

23:05. Энди бор эътиборимизни Фазлиддин Ғоибназаровнинг жангига қаратамиз! Яна битта олтин бўлса ажойиб бўларди!

22:55. Айни пайтда Шаҳобиддин Зоировга олтин медал тақдим этилди ва унинг шарафига Ўзбекистон мадҳияси янграмоқда!

22:47. Бизни шунингдек Фазлиддин Ғоибназаров иштирокидаги финал жанги кутиб турибди. Бу тарихий онлар, ўртоқлар! 

22:46. Бироздан сўнг эса яна бир курашчимиз Магомед Ибрагимов бронза медали учун жангга чиқади. 

22:45. Айни пайтда курашчимиз Иҳтиёр Наврузовга бронза медаллари топширилмоқда.

22:30. УРААААА!!! ЗОИРОВ ОЛТИН МЕДАЛ СОҲИБИ!!!! ҒАЛАБА МУБОРАК ЎРТОҚЛАР!

22:17. Шаҳобиддин Зоировнинг финал жанги бошланди!

22:13. ҚОЙИЛ!!!!! КУРАШЧИМИЗ БРОНЗА МЕДАЛИ СОҲИБИ! РАҚИБ СЎНГГИ СОНИЯЛАРДА ОЧИҚ ЖАНГДАН ҚОЧГАНИ УЧУН ЖАРИМАГА ТОРТИЛДИ. ЯКУНДА ЭСА СЎНГГИ ОЧКОНИ ҚЎЛГА КИРИТГАН НАВРУЗОВ 7:7  ҲИСОБИДАГИ ДУРАНГНИ ҚАЙД ЭТГАН ҲОЛДА БРОНЗА МЕДАЛИНИ ҚЎЛГА КИРИТДИ. МОНГОЛ ЭРТА ХУРСАНД БЎЛИШНИ БОШЛАГАНДИ!

22:12. Афсуски, спортчимиз имкониятни бой бериб қўйди...

22:05. Иҳтиёрнинг бронза медали учун жанги бошланнди! Олға, Иҳтиёр! Бронза яқин!

21:56. Иҳтиёр Наврузов эса моғулистонлик рақиби устидан ғалаба қозонса бронза медали соҳибига айланиши мумкин! Омад тилаймиз спортчимизга!

21:55. Дўстлар, Магомед Ибрагимов ҳозирча бронза медалини қўлга киритгани йўқ. У ўтиш ўйинида ғалаба қозонди. Энди бронза медали учун украиналик спортчига қарши жанг қилади.

21:52. Яна битта жангдан сўнг Иҳтиёр Наврузов монголиялик рақиби билан бронза медали учун жанг қилади. Кутамиз!

21:45. Қойил! Спортчимиз 23 сония ичида рақиби устидан соф ғалабага эришди! Энди у бронза медали учун жанг қилади!

21:43. Эслатиб ўтамиз, эронлик курашчи ўтиш турнирининг биринчи босқичида польшалик рақибини мағлубиятга учратган.

21:41. Курашчимиз жангга чиқиб келмоқда. Олға! Бизга медал керак!

21:35. Магомеднинг жангига оз вақт қолди... 5 дақиқа. Кутамиз!

21:30. Иҳтиёр Наврузов бронза медали учун жангда моғулистонлик спортчига қарши гиламга чиқади. Ушбу жанг 22:00 дан сўнг бўлиб ўтиши режалаштирилган. Шахобиддин Зоировнинг финал жанги билан бир вақтга тўғри келиб қолади шекилли...

21:22. Яна битта жангдан сўнг Ибрагимовнинг жанги бўлади. Бироз чўзилмоқда...

21:10. Яна 15 дақиқалардан сўнг Магомед Ибрагимов эронлик Али Ризо Ёзданига қарши гиламга чиқади. Агар у ушбу баҳсда ғалаба қозонадиган бўлса у бронза медали учун украиналик курашчига қарши жанг қилади.

21:00. Айни пайтда эркин курашда ўтиш турнири бошланди.

20:20. Бироздан сўнг курашчиларимиз ўз чиқишларини бошлайдилар.

20:02. Унгача эса эркин курашчиларимиз бизга бронза медалини тақдим этишлари мумкин. Соат 20:45 дан бошлаб эркин курашда ўтиш турнири, бронза медаллари учун жанглар бошланиши кутилмоқда. Бизнинг икки спортчимиз Иҳтиёр Наврузов ҳамда Магомед Ибрагимовлар ушбу баҳсларда гиламга чиқишлари лозим.

20:00. Эслатиб ўтамиз, 22:15 да боксчимиз Шаҳобиддин Зоиров финалда россиялик кучли боксчи Миша Алоянга қарши жанг қилса, Фазлиддин Ғоибназаров Озарбайжон номидан Олимпиадада иштирок этаётган кубалик боксчи Лоренцо Сотомайорнинг додини бериши лозим бўлади)

19:40. Сайтимизда бироздан сўнг финал жангини ўтказадиган Фазлиддин Ғоибназаров билан интервью чоп этилди. Олимпиадани бўлажак чемпионининг фикрлари сиз учун қизиқ бўлса, ўқиб чиқишингиз мумкин :)

19:10. Магомед Ибрагимовнинг рақиби финалга чиқди. Энди унда бронза медали учун курашиш имконияти бор. Соат 20:45 дан бошлаб бугун эркин курашда ўтиш баҳслари бошланади.

19:00. Бронза медаллар учун жанг Тошкент вақти билан соат 21:30 дан сўнг бошланиши режалаштирилган.

18:50. Афсус... Иҳтиёр ярим финалда россиялик курашчига 7:18 ҳисобида имкониятни бой бериб қўйди. Энди у кечки пайт бронза медали учун бўладиган жангда иштирок этади.

18:45. Наврузовнинг россиялик рақибига қарши жанги бошланди. 

18:35. Афсуски, Ибрагимов чорак финалда рақибига 3:12 ҳисобида имкониятни бой бериб қўйди... Агар унинг рақиби финалга чиқадиган бўлса, курашчимизда бронза медали учун курашиш имконияти бўлади..

18:32. Бу орада Андрей Петров кутилганидек марафондаги иштирокини якунлади. Аниқроқ қилиб айтадиган бўлсак, у финишга етиб бора олмади.

18:30. Магомед Ибрагимовнинг озарбайжонлик спортчига қарши чорак финалдаги жанги бошланди! Яна битта ярим фина керак! Давай, Магомед)

18:26. Марафончимиз Андрей Петров 15 км дан сўнг 155 нафар спортчи ичида...154-бўлиб кетмоқда...

18:20. Энди Наврузов ярим финалда россиялик Сослан Рамоновга қарши гиламга чиқади.

18:15. Курашчимиз қийин кечган жангда 8:5 ҳисобида ғалаба қозонди ва ярим финал йўлланмасини қўлга киритди!

18:03. Наврузовнинг жанги бошланди. Ярим финал сари олға!

17:59. Иҳтиёр Наврузов иккинчи жангини ўтказиш учун гиламга чиқиб келмоқда.

17:55. Энди у ярим финалга чиқиш учун озарбайжонлик спортчига қарши курашади.

1748. Магомед Ибрагимов рақибини 13:0 ҳисобида мағлуб этди! Яхши!

17:30. Яна бироздан сўнг Магомед Ибрагимов нигериялик Сосо Тамарауга қарши курашади.

17:25. Энди у чорак финалда пуэрто-риколик курашчига қарши жанг қилиши лозим.

17:15. Иҳтиёр 7:7 ҳисобидаги дурангга эришди. Сўнгги очкони айнан у қўлга киритгани учун ғалаба айнан Наврузовга берилди.

17:02. Наврузовнинг жанги бошланмоқда!

16:55. Бир неча дақиқалардан сўнг эса бошқа бир спортчимиз Ихтиёр Наврузов баҳрайнлик Адам Батиров билан жанг қилади.

16:50. Энди Магомед Ибрагимов тахминан бир соатлардан сўнг 1/8 финалда нигериялик спортчига қарши жанг қилади.

16:46. Ажойиб! Ҳамюртимиз рақибини техник ҳисобида мағлуб этиб, кейинги босқичга йўлланма олди. Унинг рақиби гиламга чиқмади.

16:40. Жанг бошланди.

16:25. Яна оз вақтдан сўнг эркин курашчимиз гиламга чиқади.

16:00. Кураш баҳслари соат 16:30 дан бошлаб старт олади. -97 кг вазн тоифасида юртимиз шарафини ҳимоя қиладиган Магомед Ибрагимов баҳсларга саралаш босқичидан қўшилади. Унга гвинея бисаулик Жонде Бедопасс рақиблик қилади. Ушбу жанг тахминан 16:40 да бўлиб ўтиши кутилмоқда.

15:00. Бугун қуйидаги спортчилар Олимпиадада Ўзбекистон шарафини ҳимоя қиладилар:

Магомед Ибрагимов - (эркин кураш, саралашдан финалгача) - 16:30 дан сўнг

Иҳтиёр Наврузов - (эркин кураш, нимчорак финалдан финалгача) - 17:00 дан сўнг

Андрей Петров - (енгил атлетика, марафон) - 17:30

Шаҳобиддин Зоиров - (бокс, финал) - 22:15

Фазлиддин Ғоибназаров - (бокс, финал) - 23:00

14:55. Ассалому алайкум. Олимпиадада иштирок этадиган спортчиларимизнинг чиқишларидан матнли онлайн трансляция қилишни бошлаймиз.